Hêrişê îşxalî yê dewleta tirke yê vera Herêmanê Pawitişî yê Medya dewam kenê. Herêmanê Zap, Çemço û Sîda de dewleta tirke bi heme hêz û îmkananê xo yê teknîkîyan hêriş kena. Gerîlayî bi xoverdayîşê girdî cewabê nê hêrişan danê. Nê gerîlayan ra yew zî Şehîd Felat Hîwa Sine bi. Şervanê HPGyî Felat Hîwa Sine verî ke şehîd bibo roportajê xo yê ANFyî de derheqê hêrişê dewleta tirke û xoverdayîşê gerîlayan de qisey kerdbi.

Gerîla Hîwa Sine wina vat: “Şer û xoverdayîş sey xançerêkî kewt zerrîya dişmenî. No şero ke qewimîyeno hem arazî de hem zî mewzîyan de zaf zor dano dewleta tirke. Ma seba ke paştî bidê embazanê xo yê xoverdayoxanê mewzîyan, bi ruhê fedayîyî têkoşîn kerd. Nê operasyonî raştîya dişmenî eşkera vet meydan.  Vera embazanê ma her qeyde hêrişî ameyî kerdene la ê nêeşkayî îradeyê ma bişikinê. Wextê ci yo ke ma sozo ke dayo Rayber Apo û şarê xo, bîyarê ca.  Ma semedê pawitişê Girê Werxelê arazî de bî.  Ma bîyî şahîdê bi seyan sûcanê şerî, nê sûcî verê çimanê ma de bîyî. Leşkerê dewlata tirke nêeşkenê vera Apoyîyan şer bikerê. Têna eke yew veng bêro tersî ra remenê, mewzîyanê xo caverdenê. Raştîya dewleta tirke na ya.

Dişmen seba ke ser nêkewt, îşxal dahîna xorî kerd. 15ê êlule de bi kobra, teyarayanê şer û keşîfî ame tunelanê Şehîd Felatî. Eynî wextî de leşkeran hêrişê herêmanê  Şehîd Fedakar û Şehîd Agirî kerd. La embazan destûr nêda dişmen debikewo  tunelan. Embazan bi ruhê fedayîyî cewab da û xeylêk leşkerî merdî. Dewleta tirke merde û birîndarê xo erdî de vedayî û xo peyser ante. Seba ke debikewê Sîda reyna bombarduman kerd la netîce nêgirewte. Cenazeyê leşkeran bir rojan erdî de mendî. 

Dişmen çekanê kîmyewîyan ê cîya cîyayan şuxulneno. Vera nê hêrişan ma zî tedbîrê xo girewtî. Dewlata tirke û heme dinya zana ke şuxulnayîşê çekanê kîmyewîyan sûc o. Rixmê nê hemîyan dewleta ke endama NATOyî ya nêeşkena vera gerîlayan şer bikero. PKK de tim bi ruhê fedayîşî têkoşîn yeno kerdene.  Se beno wa bibo, gerîlayî tim serkewtişî esas genê û destûr nêdanê dişmen Kurdîstanî îşxal bikero.”