Merkezê Îrtîbat û Çapemenîye yê Yewiyanê Xoverdayîşî yê Şingalî (YBŞ) derheqê hêrişê dewleta tirke yê vera Şingalî de eşkarîye daye û nê pare kerdî:

“Dewleta tirke ya îşxalkere ewro saetanê nêmroje de pê droneyanê çekdarî merkezê Şingalî de hêrişê keyeyêkî kerd. Netîceya hêrişî de xesaro madî vejîya werte. Dewrê peyênî de hêrişê hewayî yê dewleta tirke ye vera Şingalî zêdîyayî. Hewteyo ravîyarte de vera meymanxaneyêkî hêriş kerd û ewro zî nêzdîya Kubeyê Hesîn Mama de vera  keyeyêkî hêriş ame kerdene. Badê weçînitişanê Vakurê Kurdîstanî û Tirkîya rejîmo faşîst ê AKP-MHPyî semedê xeripnayîşê huzur û asayîşê Şingalî kewt dewre. Bitaybetî demê peyênî de seba ke verê şarê ma bîgêrê ke wazenê kampan ra agêrê Şingalî, hêrişê dewleta tirke zêdîyayî.  Gerek şarê ma vera nê hêrişan wirzo payan ser, nêrazîbîyayîş ramojno ke destûr medo îşxalkerî na herra bimbareke îşxal bikerê. Gerek şarê ma vera hêrişan xover bido û Şingalî bipawo.”