Fermadarîya Qerargehê Merkezê YJA Starî nasnameyê di şehîdan eşkera kerdî û nê vatî:

“ Fermandara jîhate ya şarê ma, cinîya sade, azede û esîle endama Konseya Fermandarîya HPG û YJA Starî û fermandaranê Qerargehê Merkezî ra Gulçîya Gabar û hemraya ma Pelşîne Newroz 29ê nîsane 2019î  warê Çemankê yê herêma Garê de netîceyê hêrişî de şehîd bîyî. No hêriş bi destê hemkaranê herêmî û gerreyê ajanan ame kerdene. Fermandara ma ya girde hemraya  ma Gulçîya ke pêro emrê xo semedê azadîya şarê ma û cinîyan ê kurdan feda kerd, çi heyf ke bi destê xayînan şehîde bîye. Ma sere de merdimanê erjîyayeyan ê hemrayanê xo Gulçîya Gabar û Pelşîne, şarê Mêrdînî,  heme şarê xo yê welatperwerî rê serweşîye wazenê. Ma sey embazanê çeke yê înan soz danê ke ma do dişmenî ra hesab bipersê, qesasê şehîdanê xo bîgêrê.

Nasnameyê embazanê ma yê şehîdan wina yê:

Nameyê Qodî: Gulçîya Gabar Name û Peyname: Servete Aydin Cayê Bîyayîşî: Mêrdîn Maye-Pî: Rahime – Sabri Tarîx û Cayê Şehadetî: 29ê Nîsana  2019yî / Garê

Nameyê Qodî: Pelşîne Newroz Name û Peyname: Gulîstane Orçun Cayê Bîyayîşî: Mersin Maye-Pî:  Selime – Abdullah Tarîx û Cayê Şehadetî: 29ê Nîsana  2019yî / Garê

Fermandara ma ya qehremane Gulçîya Gabar Mîdyatê Mêrdînî de yena dinya û keyeyêkê welatperwerî de bena pîl û 1992 de pîya bi embaza/ê xo ya/yê domanîye tewrê sefanê gerîlayan bena. Wextê serhildananê Cizîre, Nisêbîn, Kerboran, Amed û Hezexî de têkoşînê nas kena û bi nê ruhê serewedarteyî bi serran têkoşîn rayra bena. Embeze Gulîçîya cuyeya xo ya şorişgêre ya nêzdîyê 30 serran de sere zerrîya Kurdîstanî  Botan de waranê Gabar, Besta, Herekol, Kato û Colemêrg, Amedî ra heta Kobanê, Erziromî ra heta Garzan û Garê her vinceyê herra welatê ma de arêqê çareyî rişna, rêçê xo tede verdayî, çiranê ci ra awe werde, payna her kerraya ci û her mewzî de şer kerd. Têkoşînê nêzdîyê 30 serran ê hemraya ma Gulçîya semedê ma manifesto yo. 

Roja verêne ra pê kede, cesaret û dîsîplînê xo bena fermandara serkêşe. Tim wextan û cayanê krîtîkan de berpisîyarîye grewtêne xo ser û tewr peynî de Fermandarîya Qerargehê Merkezî de ca girwtêne. Ma pêro musnaye ke gerîlatîye yew felsefe yo. Serranê verênan pêkewtişêk de birîndar bîye, bi rojan embazanê xo ra dûrî mende la bi îradeyê zixmî xo resna embazanê xo. Senî ke şaîr vano; vêşan mend, têşan mend la eşqê ci aya canêverda. A eşiqê Rayberîye, welatê xo, koyan, gerîlayan û embazanê xo bî. Cuyeya fermandara ma ya birumet û sereberze ya ke gave bi gave bi kede ameye mûntene bi desan romanan eşkena bêro nuştene. Hemraya ma Gulçîya sey fermandara serkêşe tarîxê têkoşînê ma de rêçê ke nînê vîrakerdene verdayî. Ma do meşaleyê azadîye yo ke aye teslîmê ma kerdo biresnê serkewtişî.

Hemraya ma Pelşîne zî bi kulturê welatperwerîye yê Mêrdînî bena pîl, binê tesîrê têkoşînê Kobanê û Rojawanî de manena û 2015 de tewrê têkoşînê azadîye bena. Hemraya ma Pelşîne xeylêk hemleyanê vera DAÎŞî de aktîf ca gena. Bado ke wezîfeyê xo bi serekwtişî ana ca, verê xo dana koyanê azadan. Herêmanê Pawitişî yê Medya de perwerde vînena û sey  gerîlaya serkewtîye xebatanê Qerargehê Merkezê YJA Starî de ca gena.”