Di gerîlayê HPGyî Atîlla Çîçek (Leheng) û Huseyîn Yildirim (Alîşêr) hetê hukmatê Paşînyanî yê Armenîstanî ra teslîmê Tirkîya ameybî kerdene. Vervatoxê Karanê Teberî yê KCKyî Zagros Hîwayî rojnameyê El Nehar El Arabî rê babete ercnaye.

Hîwayî da zanayene ke wird gerîlayî teşrîna peyêne ya 2021î de Avareşe de seba ke şertê hewayê xirabî ra rayîrê xo şaş kerdo resayî sînorê Armenîstanî. Hîwayî vat: ''Wird gerîlayî raştê pawitoxanê sînorî yê Armenîstanî ameyî. Înan seba ke Armenîstan sey dostî dîyêne bê pêkewtişêk dîyalogî nayî ro. La wirdî zî tepişîyayî, Erîvan de ameyî dekerdene hucre.''

Zagros Hîwayî prosesê muhakemekerdişî ser o zî qisey kerd û vat: ''Edaletî Armenîstanî derheqê înan de dewa akeno û avûkatî dano ci. Mehkeme cezaya zîndanî ya 8 serran dana înan, naye ser o embazê ma dest pê grevê vêşanîye kenê. Xîretanê avûkatan û tay kesan ra dima dewa şina Mehkemeya Berze û 28ê sibate de cezaya zîndanî betal bena. Mehkeme bire dana ke wird embazê ma zî vera bidîyê. La embazê ma bi hawayêkê îlegalî tepişîyenê.

Goreyê agahîya destê ma birê Kînyas Hasanov Serekwezîr Nîkol Paşînyan û tay selahîyetdaranê dewlete de pêvînayîşî keno. Ame îfadekerdene ke weşîya wirdêmînan zî hol a û sond dîya ke ê do vera bidîyê. Coka ma zî b rayîrê çapemenîye derheqê rewşa di embazan de zanayîşêk pare nêkerd. Ma nêeşkayî raşta raşte nê embazan de têkilîye virazê. Ma bi rayîrê avûkat, kes û dezgehanê kurdan têkilîye ronaye.

Kurd û armenîyî heman erdî de ciwîyenê û wird şarî zî tim raştê zulm û qirkerdişê dewleta tirke ameyî. Qederê ma yew o. Coka ma do rayîr nêdê ke hukmatê Paşînyanî zerar bido nê qederê hemparî. Teslîmkerdişê wird embazanê ma kurdan rê nê, armenîyan rê îxanetêko tewr pîl o. Ma zanenê ke temsîlkarê şarê înan zî nê îxanetî qebul nêkenê. Armenîyan bi rayîrê medya nêrazîbîyayîşê xo cara îfade kerd. No îxanet do zerar nêdo têkilîyanê ma yê bi şarê armenîyan, eqsê ci do bibo sebebê zêdîyayîşê têkoşînê ma yê vera faşîzmî.''