Hukmatê Başûrê Kurdîstanî hema zî meaşê temmuze û tebaxe nêdayî karmendan. Hetê bînî ra herême de meseleyêka ceyran û awe ya cidî est a.

Rewşêka winayêne de ke şarê Başûrê Kurdîstanî mîyanê meseleyanê ekonomîk û komelkîyan de yo û beno hedefê hêrişanê dewleta tirke keyeyê Barzanîyan seba domananê ke bi mîlyonan dolarî zanîngehan akeno. 

Zanîngehê Îngilîzî yo Mîyanneteweyî (Britisj International University)

Serekê Hukmatê Federalî yê Kurdîstanî Mesrûr Barzanîyî roja çarşemeyî no zanîngeh akerd. Zanîngeh bi 100 mîlyon dolarî ame akerdene. Zanîngeh aîdê lajê Mesrûr Barzanîyî Arîn Barzanîyî yo. Arîn Barzanî hema 20 serrî yo la Hukmatê Herêma Federale ra meaşê tegmenîye gêno.

Zanîngehê Kurdîstanî (University of Kurdistan-Hewlêr)

No zanîngeh aîdê Îdrîs Barzanî yo ke lajê Serekê Îdareyê Herêma Kurdîstanî Nêçirvan Barzanîyî yo. Goreyê qanûnan keso ke tewr tay 10 serran zanîngehan de xebitîyayo eşkeno serekîya zanîngehêkî bikero. La Îdrîs Barzanî hema 20 serrî yo. Îdrîs Barzanî hem sey îdarekar hem zî sey xebatkarê zanîngehî meaş gêno.