267 cenazeyan ra 10 cenzeyê bînî yê ke Goristanê Garzanî ra serra 2017î de ameybî remnayene testê DNA ra dima a keyeyanê înan rê meyî teslîmkerdene.

267 cenazeyî dima ke Goristanê Garzanî ra bê destûra merdimanê înan ameybî remnayene Goristanê Bêkesan ê Kîlyosî de ameybî defnkerdene. Vizêr serê sibayî keyeyan seba ke cenazeyan bigêrê muracatê Serdozgerîya Komare ya Îstanbulî kerd. Keyeyan ewro Goristanê Kîlyosî ra badê di serran cenazeyê xo  girewtî. Keyeyî cenazeyan do berê şaristananê xo de defin bikerê. Cenazeya Huseyîn Donerî seba ke dokumentê ci Serdozgerîye ra nêameyî, nêdîyaye keyeyê ci. Nameyê keyeyanê cenazeyan ser o waka Muzeyyene Gordegîr Şukrîye Sîncer qisey kerd û vat: "Têkoşînêkê derg û dila ra dima ma cenazeyê xo girewtî. Keyeyê bînî zî wa bêrî û wayîrê cenazeyanê xo bivejîyê." 

Qiseykerdişan ra dima cenazeyî bi dûayan ameyî erşawetene şaristananê înan. Nasnameyê 10 cenazeyan wina yê: Ferhat Can (Ferhat Garzan), Burhan Altintaş (Numan Tatvan), Fedakar Turan (Vecîp), Faysal Bîngol, Mehmet Reşît Karakoç, Necla Karabey (Zekîye), Ahmet Doner (Edîp), Behzat Yildirim (Kanî Garzan), Muzeyyene Gordeger (Bêrîvane), Nadîre Elma (Nalîne).