Herêma Diyîne ya Îstanbulî ra Namzetê Partîya Çep a Keske û Hemvervatoxê HDKyî Cengîz Çîçek 1978 de Dêrsim de dadîya xo ra beno û 1985 de keyeyê xo reyde koçê Îzmîrî keno.  Çîçek Zanîngehê Marmara de Beşê Huqûqî ra beno mezûn. Çîçek xo wina pênase keno: ''Ez keyeyêkê kedkar, elewî û kurdî ra ya.'' 

Çîçekî îfade kerd ke herêma diyîne ziwan û bawerîyanê cîyayan ra yena pê û no tablo zî bingeyê fikrîyatê HDKyî yo. Çîçekî vat: ''HDK armanc keno ke meseleyanê bindestan çareser bikero û cuyêka hempare awan bikero. Nê hetî ra mabênê HDK û Partîya Çep a Keske de yew pêmendiş est o. Herêma Diyîne ya Îstanbulî herêma koçî ya ke tede elewî, kurdî, multecîyî, armenî, sûryanî ûsn. ciwîyenê. Reyna na herême herêma tarîxî ya. Reyna herêma diyîne herêma xoverdayîşî ya ke ma Taksîm de wextê Gezî de dîbî.''

Çîçekî bale ante ser ke herêma diyîne de xeylêk mexdûrê Erdlerzê 6ê Sibate est ê la ê bi armancê weçînayîşî nêzdîyê mexdûran nêbenê. Çîçekî vat: ''Têkilîya bi mexdûranê erdlerzî de ma kenê ke birînanê înan rê derman bibê û meseleyanê înan çareser bikerê. Ganî pêro embazê ma bi na hîsgerîye nêzdîyê nê mexdûran bibê. Erkê pêro elewî, kurd, sosyalîst û ê bînan o ke hesabê nê afatî AKP-MHPyî ra bipersê. Çunke nê afatî de mesuldarîya înan pîl a. Sere de mexdûrê erdlerzî ganî ma her kesî reyde îtîfaqê xo pîl bikerê. AKP-MHP polîtîkaya xo ya erdlerzî zî tede pêro polîtîkayanê xo koçkerdişê merdiman ser o keno. Coka ma venga ê kesanê ke herêmanê erdlerzî ra ameyê, danê ke wa xo biresnê ma. Ma do her babete de hetkarîya înan bikerê.''

Çîçekî vist vîrî ke ciwanî zaf eleqe mojnenê Partîya Çep a Keske û vat: ''Meseleyê welatî hende pîl ê ke ciwanî mîyanê înan de bi hawayêkê normalî benê polîtîk. Ma ciwanan teyna sey weçînitoxan nêercnenê. 14ê Gulane seba ma a roj a ke ma do tede nê îqtîdarê gemarinî, faşîstî û tekperestî ra hesab bipersê. Ciwanî seba ney xîret kenê. Ma wazenê ke ciwanî hîna zaf tewrê xebatanê ma bibê. Ma do pîya nê bendan ra derbaz bibê. Eke ma yew bibê, ma eşkenê heqê pêro zehmetîyan ra bêrê.''