Badê wird erdlerzanê girdan ê 6ê sibate hûmara kesanê ke dinyaya xo bedilnaye, her hele zafêr bena. Bi rojan o hema cayê ke dewlete nêrasaya ci est ê. Şar dormeyê xirban de ke merdimê înan binê de yê , gazî keno , hetkarî wazeno la dewlete şar mergî rê caverdayo.

Serekê Komeleya Kulturî ya Pîr Sultan Abdalî Cuma Erceyî çimdarîya xo ya erdlerzî wina ard ziwan: ''Çîyo ke mi dî îhmal, rijnayîş, bêçareyîye, kaos û hêrs o.''

Erceyî vat: ''Ma nêeşkenê erdlerzî vindarnê la ma eşkayêne şarî erdlerzî ra bixelisnê. No cînayetêk o, qirkerdişêk o. Hişmendane kenê ke herême veng bikerê û şarî zafêr bikerê mexdûr.''

Serekê Federasyonê Komeleyanê Elewîyan Celal Firato ke herêmanê erdlerzî yê Semsûr û Meletî de xebat rayra beno qala rewşa peyêne û îhmalê dewlete kerde.

Wendekarê unîversîte Mehmet Kaşaro ke sey kesêkê zerrîwazî Îzmîrî ra ameyo Elbîstan vat: ''Tîya  dewlete çîn a. Şar birînanê şarî pêşeno, dewlete nê. Ma Cemxaneyê Elbîstanî ser o hetkarî organîze kenê. Tay cayan de hema rijnayîş sey xo paweno, qet xebatêke nêameya kerdene.''