15ê hezîrana 2023yî de Warê Xoverdayîşî yê Girê Şehîd Şahînî yê Xakurkê de 3 gerîlayê HPGyî şehîd bîyî. Nê şehîdan ra yew zî gerîlayo alman Azad Şerger (Thomas Johann Spiess) bi.

Azad Şerger şaristanê Mainburgî yê Almanya de dadîya xo ra bîyo û 2016 de tewrê gerîlayan bi. Wekîlanê Partîya Çepe çend rojî verî şehadetê Azad Şergerî ser o vernîyazê persan pêşkêşê Meclîsê Federalî kerdbi.

Hukmatê bi serekwezîrîya Olaf Scholzî cewab da vernîyazê persan. Hukmatê Berlinî da zanayene ke înan derheqê Azad Şergerî de agahîyî çapemenîye ra eşnawitê la Tirkîya û Iraqî ra eşkerayîyêka fermîye nêameya.

Hukmatê Almanya pare kerd ke înan dewleta tirke ra persayo ke agahîyê serê Thomas Johann Spiessî raşt ê yan ney. Hukmatê Almanya dîyar kerd ke dewleta tirke cewab nêdayo persanê înan.

Hukmatî wina cewab da persa 'Gelo Almanya û welatê bînî yê NATOyî paştî danê operasyonanê leşkerîyan ê dewleta tirke yan ney?': ''Na babete de destê ma de agahîyêke çin a.''

Hukmatê Almanya persa 'Hêrişanê dewleta tirke yê vera Başûrê Kurdîstanî de malzemeyê leşkerî û çekê Almanya şuxilîyenê yan ney?' ser o no cewab da: ''Hukmatê ma sîyasetê rotişê çekan ano ca. Coka şerê kurdan rê yan zî operasyonanê leşkerîyan rê destûr nêdîyeno ke çekê krîtîkî bêrê rotene.''