Qirkerdişê Mereşî 45 serrî xo pey de verdayî. Qirkerdişî 7 rojan dewam kerd û tede tewr tay 500 kesî ameyî qetilkerdene, 559 banî û 290 kargehî rijîyayî.

Serekê Şubeyê Amedî yê Komeleya Kulturî ya Pîr Sultan Abdalî (PSAKD) Aydin Atliyî derheqê babete de ANFyî rê qisey kerd.

Atliyî pare kerd ke dewleta tirke qetî nê qirkerdişî de têrî nêameya û vat: ''Qirkerdişê Mereşî vera elewîyanê kurdan ame kerdene. Bi nê qirkerdişî zemînê Darbeya 12ê Êlule zî ame amadekerdene. Dewlete ne Qirkerdişê Mereşî de ne zî qirkerdişanê xo yê bînan de têrî ameya. Coka qirkerdişê winayênî do dewam bikerê. Bi taybetî polîtîkaya bêcezaverdayîşî ya dewlete cesaret dana qirkerdişanê newetyan. Qirkerdişê Mereşî de çewî raşta zî ceza nêgirewte û pêro sûcdarî vera dîyayî.

Dewlete Terteleyê Dêrsimî de zî, Qirkerdişê Madimakî de zî û Qirkerdişê Mereşî de têrî nêameya ke nê pêro vera elewîyan ameyê kerdene. Mereş de a raşte qirkerdişêko hîna pîl ame pîlankerdene la elewîyan xo ver da. Rapor û belgeyê serê Qirkerdişê Mereşî binê nameyê 'sirê dewlete' de nênê eşkerakerdene. La ma qirkerdişê vera elewîyan xo vîr a nêkerd û do nêkerê.''

Atliyî îfade kerd ke dewlete bi polîtîkaya yewperestîye 100 serrî yo elewîyan qetil kena û wazena neteweyêka 'tirk û misilmane' awan bikera. Atliyî ard ziwan ke îqtîdarê AKP-MHPyî zî heman polîtîka ano ca. Atliyî vat: ''Dewlete û îqtîdarî elewîyan sey gefî vînenê û polîtîkayanê asîmîlasyonê elewîyan anê ca. Ma sey elewîyan nêwazenê ke bêrê namekerdene. Ma wazenê ke bişinasîyê. Ma do qetî namekerdişanê îqtîdarî qebul nêkerê.''