Partîya Demokratîke ya Şaran (HDP) çarçeweya ''Kampanyaya Pawitişî'' de Riha de bi şîarê Ma HPDyîjê her ca de yê têhetameyîşê şarî organîze kerd. Hemsereka Pêroyî ya HDPyî Pervîne Buldan û Hemserekê Pêroyî yê DBPyî Keskîn Bayindir hetê partîyîjan ra dekewtişê bajarî de ameyî pêwazîkerdene. Dima ra sey konvoy şîyî verê banê rêxitina qezaya Karakopru. Şar pê slogananê HDP şar o şar tîya de yo û biciwîyo xoverdayîşê HDPyî konvoy pêşwazî kerd.

Qiseykerdişê Pervîne Buldan ra beşêk wina yo:

''Ewro reyna vera HDPyî hêriş ame kerdene. Zîhnîyetê ke Denîze Poyraz qetil kerd ewro zî Marmaris de hêriş kerd. Ma nê zîhnîyetî qirkerdişanê Pirsûs û Aqara Garî ra nas kenê. Ma organîzekerdoxan nas kenê. Ê do rojeke verê hukmî de hesabê nayî bidê.

Rihayîjê sîneyayî ma zanê nê menganê hamnanî de şima senî problemê ceyran û awe ancenê. Ma veng kenê înanê ke Riha îdare kenê; ma zanê ke binê polîtîkaya şima de dişmenîya vera kurdan esta. Şima pê pêsnayîşê awe citkarî qedînaye.  Şarê Riha do vîjnayîş de hesabê nayî şima ra biperso. Rîyê na polîtîka ra şarê Riha herra xo ya berketine ya ke eşkena dinya mird bikero, caverdeno sey karkeranê serrewexî  şino rojawanê Tirkîya. Karkerî ya rayîr de qezayanê trafîqî de mirenî ya zî metropolan de raştê hêrişanê nîjadperastan yenê. Sebebê nayî îqtîdaro ke kurdan û HDPyîjan sey hedefî nîşan dano.

Seba ke zanê ma ewro yenê tîya Keyeyê Şenyaşarî yo ke 128 rojî yo semedê edaletî nobeta edaletî tepişeno reyna destbend kerd. Zanê ke ma do înan zîyaret bikerê. Destbend kerdî ke ma înan nêvînê. Ma reyna na neheqîye û bêhuqûqîye şermezar kenê. Bi mîlyonan şarê Tirkîya û kurdî paştî danê Şenyaşaran. Keyeyê Şenyaşarî têna nêyo. Bêhuqûqîya ke înan rê bîya rojdemê HDPyî yo. Ma Dayîke Emîne Şenyaşar rê hurmet û heskerdişê xo şawenê.

Zextê AKPyî yê vera kurdan eşkera yo, zelal o. Mi vizêr Dîlok de qala prosesê çareserî kerd. Mi qala o wextê qiymetînî kerd. Tayîyan vatişê ma xelet girewtî dest û vat ma reyna wazenê AKP reyde masa de ronişê. Badê zulmê ke AKPyî kurdan rê kerd, badê qeyûman, zîndanan, operasyonan, fezlekeyan ê vera kurdan û heme neheqîye ke welat de ameyî kerdene  qet yew kurd/e çîn o/a ke AKP reyde mesa de ronişo, do çînê bo.

Serekkomar Amed de vano masaya prosesê çareserî hetê HDPyî ra ameye qeldayene. Ez sey kesêka o prosesî de ca girewte vana ke no proses pê destê îqtîdarî ame qedînayene. Semedê ma prosesê çareserî muhîm o. Werekna reyna no proses dest pê bikero. Birêz Ocalanî reyde pêvînayîşî bêrê kerdene. Tecrîd bêro wedaritene û meselaya kurdî bi metodanê demokratîkan bêro çareserkerdene. La ma zanê îqtîdarê AKPyî çîyo winayên nêkeno. Destê înan ra bêro her çî xirabêr kenê. Ma semedê caardişê wezîfeyê xo, îdarekerdişê welatî rê  amade yê.

HDPyî sey astengî vînenê. Ma sey HDPyî her cayê Tirkîya de yê. Ma tirke, kurd, ermenî, suryanî, elewî, sunî, cinî û ciwan ê. Cunke ma karker, kedkar, esnaf ê. Ça de problem, derd esto ma uca de yê. HDP arenaya sîyasetê Tirkîya de cayêko muhîm de yo. No yew fîkrîyat o. Nika dewaya qefilnayîşî akerda. Vanê qey eşkenê biqefilnê. Mefteyê HDPyî destê şarî de yo. Ê se kenê wa bikerê HDP seba ke welat de demokrasî, haştîye û edaletî ca bikero gurenayîşê xo rê dewam keno.''