Hemserekê Pêroyî yê HDPyî Pervîne Buldan û Mîthat Sancar pîya bi grûba parlamentoyî ver bi Merkezê Pêroyî yê Kizilayî rayra şîyî ke, badê erdlerzî bi rotişê xeyman bibi rojdem. Polîsan heme kuçeyî girewtî, naye ser o Buldane û Sancarî kuçeyê Kizilayî de qisey kerd.

Mîthat Sancarî vat: ''Îqtîdaro ke şar binê rijnayîşî de verda, eşkerayîya ma ra terseno. Kizilay qaçîko dezgehê hetkarî yo, hela ke şar serdî ra xeniqyayêne, xeymî rotî. Ehleq çîn o, şermîyayîş çîn o. Berpirsîyarê nê sîstemî, tewr corî ra heta cêrî do hesab bidê. No şar heqê xo helal nêkeno, do hesab biperso.''

Pervîne Buldan zî vat: ''No tabloyê şermî yo. Êyê ke wayîrê mexduranê edlerzî nêvejîyayî, şar binê rijnayîşan de mergî rê caverda, êyê ke herêmanê erdlerzî de çînêbî, ewro tîya nêverdenê ma eşkerayîye bidê. Ma reyna dî ke sîstem senî guruyeno. Merdim biney şermîyeno. Nînan de ne wîjdan, ne rî ne zî ehleq est o. Kizilay xeymî, gonîya xo pê pereyî rotî. Xeymê ke pê bacê şarî ameyî girewtene rotî mexdûranê erdlerzî. Ma heqê xo helal nêkenê. Ma veng kenê serekkomarê ke helalîye waşte, sere de mexdûrê erdlerzî, înanê ke merdimê înan merdî, şaranê Tirkîya ra qet kesêk heqê xo helal nêkeno. 22 rojî yo heme yew selahîyetdarî îstîfa nêkerdo. Îdarekaranê Kizilayî ra heta serekkomarî ganî heme berpirsîyarî îstîfa bikerê. Eke îstîfa nêkerê ma do înan vîjnayîş de bişawê.''