Heyetê Weçînayîşî yê Berze (YSK) eşkera kerdbî ke 14ê gulane de 7 mîlyon weçînitoxî reya verêne do raya xo bişuxilnê. Hemvervatoxê Meclîsê Ciwanan ê HDPyî Rohat Govercînî derheqê waştiş û hêvîyanê ciwanan de ANFyî rê qisey kerd.

Rohat Govercînî derheqê babete de vat: ''Eke ma biewnê prosesê Newroze ra, hîrê paran ra zêdeyê parêkî do raya xo bido Partîya Çep a Keske. Newroze ma bi coşî fîraz kerde û ma dî girseyê Newroze ciwanan ra ameyêne pê. Ciwanan Newroze vurnabî 'Newroza Ciwanan.' Ciwanî do 14ê gulane de zî rolêkê dîyarkerî kay bikerê. Ciwanî destpêkî ra nata azadîye  û têdûştîye wazenê. Ciwanê HDPyî nê 8-9 serran de raştê teda, destbendkerdiş û tepiştişî yenê la rixmê ney zî aktîf û xoverdayox ê.''

Govercînî pare kerd ke ciwanî hukmatê nikayênî de ameyoxê xo nêvînenê û vat: ''Ganî ma sebebanê krîzê ekonomîkî hol fam bikerê. Ciwanan rê îmkanê karî nênê afernayene û ciwanê mezûnê unîversîte ameyoxê xo nêvînenê. Budçeya ciwanan dîyena bombayan û guleyan. Ma do tim vera polîtîkaya şerî bibê û biresê aramîye. Ciwanan hêrs û waştişê xo yê vurnayîşî pêser kerdo. Ma hesreta welatêkê azadî ancenê. Seba ke ma ney bivisnê destî ganî dormeyê Partîya Çep a Keske de bibê yew, 24 saetan bixebitê û îqtîdarê AKP-MHPyî birijnê.''