Îstanbul de deklarasyon û programê Newroze ameyî eşkerakerdene. Kombîyayîşo ke Otêla Elit Worldî de ame kerdene,  Hemserekê Pêroyî yê HDPyî Mîthat Sancar, Vervatoxa HDKyî Esengule Demir, temsîlkarê pabesteyê Îtîfaqê Kede û Azadîye û xeylêk kesî tewrê ci bîyî.  Bado ke Esengule Demir deklarasyono hempar wend, Sancarî qiseykerdişêko kilm kerd.

Deklerasyon de nê ameyî vatene: ''Newroze sere de semedê kurdan semedê şaranê Rojhelatê Mîyanênî û Mezopotamya sembolê newe ra ganîbîyayîşî yo. Newroze roşanê ganîbîyayîşî yê şaran o. Newroze; cuye ya, azadîye ya. Newroze vera Dehaqê zalimî serkewtişê Kawayê Asinkarî yo.

Newroze vera dîktatorîye roja têkoşînî ya

Şarê ma bi hezaran serran o ke Newroze bi nê zanayîşî pîroz keno. Newroze; vera dîktatorîye, roja têkoşînê şaran a. Sey her serre emser zî do adirê azadîye bêro tafînayene. Ma emser Newroze dîyarîya kesanê ke erdlerz de dinyaya xo bedilnaye, kenê.

Ma do her warê Newroze de hêrsê xo biçarnê hêvî. Ma bertengê resnayîşê serkewtişanê girdan de yê. Ma do morê xo bidê binê serkewtişanê tarîxîyan ro. Ma do derûdorê adirê Newroze de semedê haştîye û edaletî biqîrê. Ma veng danê şarê xo ke wa tewrê Newroze bibê ke do bi şîarê, “Her der Newroz, Her dem Azadî” û “Bi adirê Newroze ver bi azadîye ” bêro pîrozkerdene.''

Ma do îqtîdarî ra hesab bipersê

Mîthat Sancar vîst vîrî ke erdlerzê Mereşî riyê îqtîdarî ra açarîya felakete û vat: ''Mîyanê nê rijnayîş û dejan de ma nêeşkenê Newroze bi şayîyan pîroz bikerê. Ma do Newroze bi ruhê şîn, paştîdayîş û hêvîya newe ra înşakerdişî pîroz bikerê. Beno ke ma govende mekerê û deyîran mevajê la ma do destê yewbînan tepişê û pîya hêvî gird bikerê. Nê îqtîdarî welat fîna tarîtîye, komel binê rijnayîşî de verda. Ma do pêro pîya îqtîdarî ra hesabê nê dejan û rijnayîşanê girdan bipersê.''