Prosesê weçînayîşanê 14ê gulane de cinîyî vera kerdişanê îqtîdarî yê 20 serran zî vengê xo kenê berzêr. Îqtîdarê AKPyî de 4 hezar 300 cinîyî ameyî qetilkerdene û bi hezaran cinîyî raştê tacîz û tecawuzan ameyî.

Endama Paştdayîşê Morî Sezene Ezer derheqê kerdişanê îqtîdarî, nêrazîbîyayîşê cinîyan û waştişanê weçînayîşî yê cinîyan de ANFyî rê qisey kerd.

Sezene Ezer îfade kerd ke îqtîdarê AKP-MHPyî dişmenanê cinîyan de îtîfaq keno û vat: ''Îtîfaqê Cumhurî zî wead keno ke Peymana Îstanbulî apey bîyaro. Ma malzemaya weçînayîşî nîyê û çew nêeşkeno nameyê ma ser o qisey bikero. Ma kerdoxê cuye yê. Ma şertanê cîyakeran zî, weadan zî qebul nêkenê. Ê kesê ke bi hawayêkê raştikênî nêzdîyê meseleyanê cinîyan nêbenê, ma do vera înan tim vengê xo berzêr bikerê. Îtîfaqê Kede û Azadîye seba mesleyanê cinîyan tay çareserîyanê girîngan pêşkêş keno. Ma zî sey cinîyan do wayîrê heqanê xo vejîyê û seba awankerdişê cuyêka newîye têkoşîn bikerê.''

Ezere vist vîrî ke wextê îqtîdarê AKPyî de şîdet û tedayê vera cinîyan zaf zêdîyayê û vat: ''Îdarekaranê AKPyî ra Ozleme Zengîn seba ke girîngîya qanûnê 6284î vistbî vîrî hedefa gefanê AKPgîran bîye. No zî mojneno ke cinîyê AKPgîrî bi xo pê betalkerdişê Peymana Îstanbulî û wedaritişê 6284î qayîl nîyê. AKP veng û renganê cinîyan ra hes nêkeno. Ma do vera nînan vengê xo berz bikerê.''