Hemsereka Komeleya Heqanê Merdiman (ÎHD) a Îstanbulî Gulserene Yolerî derheqê binpaykerdişanê heqanê merdiman ê îqtîdarê AKP-MHPyî de ANFyî rê qisey kerd.

Gulserene Yolerî vist vîrî ke îqtîdarî wextêk kampanyaya 'îşkenceyî rê tolerans çin o' kerdêne la o çax zî zîndanan de îşkence est bi. Yolerîye ard ziwan ke binê adaptebîyayîşê Yewîya Ewropa de ame mojnayene ke tay 'warê azadîye' ameyê afernayene la dewlete tim sey xo menda. Yolerîye vat: ''Nika prosesêko winayên qewimîyeno ke tede rejîmo otorîter cabîyo û çew nêeşkeno qala demokrasî bikero.''

Yolerîye bale ante ser ke seba ke dezgehê mîyanneteweyî kerdişanê AKP-MHPyî rê vengê xo nêkenê  bêhuqûqîyî hende zêdîyayê. Yolerîye vat: ''Nê îqtîdarî hem huqûqê zereyî hem zî huqûqo mîyanneteweyî binpay kerd. Îqtîdar vano ke birê Mehkemeya Heqanê Merdiman a Ewropa eynê ci de nîyê. Seba ke warê mîyanneteweyî ci rê nêrazîbîyayîşê xo nêmojno îqtîdar hende bêperwa têgêra.''

Yolerîye dîyar kerd ke seba tercîhanê înan ê weçînayîşan kamyew partîye bi cidî xo nêzdîyê heqanê merdiman bikera, demokrasî biweçîna, haştî û azadîye bîyara mehqûl bena. Yolerîye vat: ''Kamyew partîye nê waştişanê ma bîyara ca ma rê qîmetîne.''