Têgêrayîşê Cinîyan ê Azadan (TJA) semedê tewrbîyayîşê ''Rayraşîyayîşê Azadîye'' yo ke do 18ê teşrîna peyêne de Gemlîk de bêro kerdene, veng da û vat hêzê cinîyan eşkeno tecrîdî bişikno.

Eşkerayîya çapemenîye  banê MED TUHAD-FEDî de ameye kerdene. Aktîvîdta TJA Safîye Akdag û Hemsereka  MED TUHAD-FEDî Emine Kaya semedê tewrbîyayîşê ''Rayraşîyayîşê Azadîye'' veng da.

Verê eşkerayîye polîsan banê komele girewt binê ablûqa û dest na pankartan ser. MED TUHAD-FED, DBP, HEDEP, endamê Meclîsê Dayîkanê Haştîye û xeylêk cinîyî tewrê eşkerayîye bîyî. Eşkerayîya kurdkî hetê Safîye Akdag û tikrkî hetê Emine Kaya ra ameye wendene.

Emine Kaya vat: ''Polîtîkayê înkarî yê vera kurdan zirar danê heqanê esasan, kultur, ziwanê dayîke û waranê cuya. Îtîfaqê AKP-MHPyî dişmenê kurdan û cinîyan o. Tecrîdo ke  2015î ra nata vera Abdullah Ocalanî yeno girankerdene vera destkewteyanê kurdan huqûqê dişmenîye yo. Tecrîd vera waştişê çareserkerdişê meseleya kurdan yeno kerdene. Eynî wextî de cuyeya cinîyan yena tecrîdkerdene.  Hêzê esasî cinîyan de yo. Azadîya fîzîkîye ya Birêz Ocalanî rojdemê ma yo esasî yo. Çunke ma semedê azadîye, azadîye pawenê. Hêzo esasî yo ke eşkeno tecrîdî bişikno, cinîyan de yo. Êyê ke mecbur manenê waranê cuyeya xo caverdê,  rayîrê macîrê de raştê tacîz û tecawuzî yenê reyna ma cinî yê. Berpirsîyarîya ma pêrun a ke ma tecrîdê serê Abdullah Ocalanî bişiknê.''