Dayîka Haştîye Xense Bulut (66)  a ke Zîndanê Qefilnayeyî yê Cinîyanê Şakran ê Îzmîrî de yena tepişene, hîrê rojî menbî ke bêro verdayene, seba ke ''poşmanîye'' qebul nêkerd, veradayîşê ci hendê hîrê aşman peydeeştene.

Bulute pê rayîrê telefonî xebere daye qicanê xo verdayîşê ci hîrê aşmî ameyo peydeeştene. Lajê ci Abdullah Bulutî hêrsê xo ard ziwan û vat: ''Cinîyêka 66 serrî rixmo ke cezaya ci qedîyaye zere de tepişenê. Cayê nê merdimîye û wîjdanî de çîn o. Eke cinîyêka extîyare û nêweşe zîndan de bimiro, do kam hesabê nê bido? Dayîka mi nêweşa hîpertansîyon û dîyabetî ya. Zîndan de nêweşîyê ci gahîna xidar bîyî. Gerek cade bêro verdayene.''

Dayîka Xense Buluta ke Konakê Îzmîrî de roniştêna 10ê êlula 2021yî de ameye destbendkerdene û tepiştene. Bulute seba 2015 Nisêbînê Mêrdînî de wextê qedexeyanê tebervejîyayîşî de keyeyê xo ra nêvejîyaye bi îdîaya ''hetkarîya rêxistine'' ameye sûcdarkerdene û cezaya di serran dîyaye ci.