HDPyî, seba mexdûranê erdlerzî, dest bi kampanyaya ‘Ma keyeyan anê têhet’ kerde. Xeylî kesan paştî daye kampanya.

Bi vilakerdişê hashtagê ‘‘#AileleriBuluşturuyoruz’’ kampanya ameye îlankerdene û wina ame vatene; ‘‘Keyeyê ke mexdûr ê û keyeyê ke wazenê paştî bidê, ma înan anê têhet. Ma îmkananê xo pare kenê.’’

Parlamenterê HDPyî vîdeo vila kerde

Parlamenteranê HDPyî herêmanê erdlerzî ra vîdeoyêke vila kerde. Wekîla Hemserekanê grûba HDPyî Merale Daniş Beştaş, ‘‘Seba mûnitişê cuyêka neweye, ma benê pirdê paştîdayîşî. Eke mexdûrê erdlerzî teber ra bibê, nêbeno ke ma keyeyanê xo de rehet bibê. Bi parekerdişê deje û cuye ma do nê rojanê zehmetîyan bivîyarnê’’

Parlamentere Fîlîz Kerestecîoglû: ‘‘Ma pîya heq ra bêrê ke heme zor û zehmetîyanê cuye bivîyarnê. Ma birînanê xo pîya bipêşê. Ma do cuyêka neweye, bi paştîdayîşî awan bikerê.’’

Sezaî Temel: ‘‘Nê rojanê zor û zehmetîyan de, çîyo ke keweno milê ma ser, o yo ke ma keyeyan bîyarê têhet, bibê hemrayê yewbînan û îmkananê xo pare bikerê.’’

Tayîp Temeli: “#AileleriBuluşturuyoruz, bi paştîdayîşê komelkî, însanî ciwîyenê. Êyê ke îmkanê înan est ê, gere mexdûran rê bêrê têhet.’’

 ‘Ma newe ra cuye awan bikerê’

‘‘Ma keyeyê HDPyî, destê xo dergê merxdûranê erdlerzî bikerê. Nika wextê piştişê birînan o. Bêrê ma pîya newe ra cuye awan bikerê. Ma paştî bidê.’’