Derzîna verêna vera vîrusê Korona ya ke rayberîya epidemiyolojist Chen Weiyî yê çinîjî de ameye averberdene testanê verênan ra dima ameye tesdîqkerdene.  Ewro ra tepîya do merdiman ser o bêro ceribnayene.

Goreyê ajansê çapemenîye yê Îspanya Europa Pressî Wezîrîya Pawitişî ya Çînî derzîne sey  bitesîrî pênas kerd û vat paşta înan na derzîne ra pît a. Coka ê bi hawayêkê lezabeze amadekarîya berardişê ci kenê.

Selahîyetdaranê Çînî menga sibate de eşkera kerdbi ke ê fikeryenê ke do menga nîsanê de derzînêke merdiman ser o test bikerê.

Xeylêk welatî semedê averberdişê derzîna vera vîrusî gureyene. La yeno vatene ke amadekerdişê înan do bi mengan dewam bikero.

Xeylêk merdimê zanistî, dezgehê akademîkî  û kargehî ûmid kenê ke hêver ê derzîna bitesîre vejê. Yeno vatene ke têna Çîn de tewr tay new derzînî merhaleyê averberdişî de yê.