Wezîrê Karanê Teberî yê DYA Mike Pompeoyî eşkera kerd ke sercergo newe yê DAÎŞî lîsteya reşe de ame cadayene. No caardiş keno ke sercerg DYA yan zî hemwelatîyanê DYA reyde têkilîyêk bivirazo.

Pompeoyî bi nê hawayî tesdîq kerd ke kam ame herinda Ebûbekîr El Bagdadîyî. El Bagdadî menga teşrîna verêne de Sûrîye de cayê rejîmê tirkî de amebi kiştene.

Dima ke Bagdadî ame kiştene DAÎŞî wextêkê kilmî de pare kerd ke Ebu Îbrahîm El Haşemî El Kureyşî sey ''şef''o newe ame tayînkerdene. Labelê no kes hetê pisporan ra nêyêne zanayene. Selahîyetdarêkê amerîkayîjî no kes sey ''yewo nêno zanayene'' name kerdbi.

Xeylêk serwîsanê îstîxbaratî yê rojawanî El Mewla sey ronayoxanê DAÎŞî û îdeologanê bingeyînan ra yew pare kerdbi û vatbi ke şefo newe yê DAÎŞî o yo.

Mike Pompeoyî kombîyayîşê çapemenîye de vat ke: ''Ma qerardar ê ke DAÎŞ çin bikerê ke şefê ci kam beno wa bibo.''

Goreyê Wezaretê Karanê Teberî yê DYA El Mewla ''endamêko aktîf ê El Qaîdeyî yê Iraqî bi.'' Dayîya zanayene ke El Mewla pêro safhayan ra derbaz bi û resa asta hetkarîye.

Sercergo newe yê DAÎŞî Anqara de yo!

Goreyê zanayîşanê ke ANFyî çimeyanê pêbaweran û îtîrafanê DAÎŞijan ra vistî destî, El Mewla hetê Tirkîya ra yeno pawitene û Tirkîya de yo. Xebera ANFyî yê 13ê sibate de amebi parekerdene ke sercergo newe peynîya serra 2017î de Îdlîbî ra pey derbazê Tirkîya bi. Nê pêro çimeyan îfade kerd ke sercergo newe yê DAÎŞî nêzdîyê serrêk o ke Tirkîya ra nêvejîya. Dîlok û Anqara de qerargehê xi estê û bi giranî Dîlok de maneno. Binê kontrolê MÎTî de endamanê DAÎŞî reyde kombîyayîşan keno û cerganê neweyan rêxistin keno.