Goreyê donayanê Unîversîteya Johns Hopkinsî pêro dinya de hûmara nêweşan bîye 201 hezar û 672. Hûmara înanê ke nêweşîye ra merdî  zî 8 hezarî ra vîyarte. Çîn de 81 hezar û 102  kesan pê janê Korona kewtî. Welato diyîn o ke tewr zaf nêweşê Korona tede estê Îtalya ya. Îtalya de hûmare resaye 31 hezar û 506î.

Tirkîya

Tirkîya de goreyê selahîyetdaran hûmara nêweşan bîye 98 û kesêk merd la yeno vatene ke hûmare hîna zêd a. Serekkomar Erdogano ke ameyêne pawitene ke ewro tedbîran eşkera bikero vat ''ma do bi dûayan nê hal bikerê''. Vera nê tewirî nêrazîbîyayîşî ameyî ramotene.

Îran

Wezîrîya Weşîye ya Îranî da zanayene ke Korona ra 24 saetanê peyênan de 147 kesê bînî merdî. Goreyê naye hûmare înanê ke merdî bîye 1135. Hûmara nêweşan zî bîye 17 hezar û 361.

Îtalya

Îtalya de hûmara nêweşanê Korona 2 hezar û 503 ya û hûmara înanê ke merdî 31 hezar û 506 a. Goreyê Dezgehê Weşîya Berze ya Îtalya êyê ke merdî serrê înan dormeyê 80,5 de yê  nêweşan zî nizdê 63 serran ê. Êyê ke merdî se ra 30 cinîy ê.  Kesê ke merdî înna de se ra 77 de adiro berz,  se ra 74 de nêgirewtişê nefesî û se ra  42 de  zî kuxike est bi.

Almanya

Almanya de hûmara nêweşan bîye 10 hezar û 87 û hûmara merdayan bîye 26. Serekwezîre Angela Merkel do saetanê şanî dî televîzyonî ra xîtabê şarî biekro û derheqê tedbîranê ke hukmatî girewtî de zanayîş bido.

Îsraîl

Îsraîl de 24 saetanê peyênan de hûmara kesanê ke nêweşîya Korona girewta se ra 40 zedîyaye bîye 427. Rewşa 5 nêweşan giran a.
 

Awustralya

Awustralya de tewr ta 533 nêweşê Korona estê. Heta  nika 6 kesan cuya xo vînî kerde. Welat de halo îstîsnayî ame îlankerdene.

Amerîka

Amerîka de 103 kesan Korona ra cuya xo vînî kerde û hûmara kesanê ke janê Korona girewto 6 hezar û 400î ravêrte.