Jano peyên do bi desan mîlyon kesan vêşan verdo

Goreyê cigêrayîşê dezgehê FEWS NETî goreyê serra vîyarte 46 welatan de tewr tay 30 mîlyon kesî do vêşan bimanê.

Dezgehê bi nameyê FEWS NETî 46 welatan de ke tede vîrusê Korona vila bi, cigêrayîşêk kerd  û tehlukeyê vêşanîye ser  o vindert. Goreyê cigêrayîşî serra 2020î de nê welatan de 1130 mîlyon kesî do hewceyê hetkarîya werdî bibê. Na hûmara doneyanê verê Korona ra 25 qat zêdêr a.

Cigêrayîş de dîya zanayene ke tedbîrê vera janî bîyî sebeb ke xeylêk kesî bêkar bimanî. Ame parekerdene ke tay welatan de zî rîyê vîrusê Korona ra butçe ame tengkerdene, bazirganîya zere û sînorî zî qels bîye.

Cigêrayîş de ame eşkerakerdene ke tewr zêdêr welatê rojawan û rojhelatê Afrîka nê krîzê ekonomîkî û vêşanîye ra zerar bivînê.