Fermandarê Operasyonê Herêma Başûrî yê Artêşa Neteweyîye yê Lîbya Mebruk El Hezevîyî vat: ''Cepheyê Eyn Zare de ke wextêkê dergî ra naya binê dormegirewtîşî de yo û tede roja sêşemeyî şer qewimîya, leşkerê tirkî ameyî kiştene.''

Hezevîyî da zanayene ke îdarekarê komêka cergan o sûrîyeyîj zî bi hawayêkê birîndarî ame tepiştene û no kes dima merd.  Hezevîyî ard ziwan ke cergê sûrîyeyîjî verî ke bimiro îtîraf kerd ke o û 10 leşkerê tirkî û 8 cergê sûrîyeyîjî pîya bi wesayîtêk ameyî û dima bîyî hedef. Goreyê Hezevîyî cergî Mîtîga ra hetkarîye waşte labelê la semedo ke dormeyê înan amebi girewtene înan rê hetkarîye nêameye kerdene. Vervatoxê Artêşa Neteweyîye ya Lîbya Ahmed El Mîsmarî zî vizêr vatbi ke ê eşkenê seba cenazayanê leşkeran ê tirkan Tirkîya reyde têkilîye ronê.