Goreyê eşkerayîya artêşa Fransa înan hukmatê Iraqî reyde bi koordîne bire daye ke karê xo yê perwerdeyî bi hawayêkê demkîyî vindarnê.

Eşkerayîye de ame vatene ke Fransa çarçewa na bire de heta fermanêkê neweyî bire daye ke personalê xo yê ke binê sîwana koalîsyonê vera DAÎŞî de ca gênê tepîya biancê.

Ame parekerdene ke artêşa Fransa do 26ê adare de roja pancşemeyî dest pê karê tepîyaantişê leşkeran û 11 teyarayanê xo bikera.

Komara Çekî zî roja sêşemeyî bire dabî ke leşkerê xo bi hawayêkê demkîyî Iraqî ra tepîya bianca.

Koalîsyonê Mîyanneteweyî yo ke seba 'perwerdekerdişê' hêzanê asayîşî yê Iraqî 2 hezar 500 leşkerê ci Iraq de yê, destpêkê verê menda adare de bire dabi ke karê xo yê perwerdeyî vindarno. Selahîeydaranê Koalîsyonî îfade kerd ke krîzê Korona ra dima ê do karê xo yê perwerde Iraq de dewam bikerê.

Na çarçewe de Brîtanya zî bire daye ke leşkeranê xo tepîya bianca. Eşkerayîya ci de ame parekerdene ke ê karê xo yê perwerdeyî qasê 60 rojan vindarnenê.