10ê Kanûne de seba wedartişê tecrîdê serê Rayberê Şarê Kurdî Abdullah Ocalanî Banê HDPyî yê Bajarê Amedî de bi serkêşîya Tevgera Jinên Azad (TJA) seba 3 rojan grevê vêşanîye amebi destpêkerdene.

Mayê Aşitî zî tede 25 cinîyî bi derb û zor ameybî destbendkerdene. Ame zanayene ke cinîyan asayîş de zî grevê vêşanîye dayo dewamkerdene. Polîsan şideto psîkolojîk cinîyan ser o bica ardo, verê hucreyanê înan de wer pewto.

Gulîstan Ektîya ke mîyanê destbendkerdeyan de bî vat ke ê raştê îşkenceyê hem psîkolojîkî û hem zî fîzîkkîyî ameyê û nê vatî: “Mayî bêsolan erd ra ameyî kaşkerdene. Terzê mudaxeleyê înan teberê rûmetê merdimîye de bi. Dest û lingê ma heme bîbî mor la înan bi yarî ma ra persayêne ‘çîyêk şima esto yan nê?’ Dima ra zî ma ra vat beno ke şima xo fînayo nê halî.

WAŞT KE GREVÊ VÊŞANÎYE BIŞIKNÊ

Ektîye nê vatî: “Înan tim ma ra vatêne qisey mekerê, eke şima qisey bikerê ma do şima bierzê hucreyanê yewkesîyan. Her hucre de ma 5-6 kesî mendêne. Sere de awêk daye ma, dimayo ke awa ma qedîyaye înan yewna nêdaye. Vatêne ‘bi ê şûşeyê petî yo ke ma dayo şima çirika tuwaletî ra dekerê bişimê, xora şima grevê vêşanîye de yê.’ Înan berê hucreyan akerdî seba ke boya werî bêro ma û vatêne ‘tirêm ma werî wina bipewjê yan wina.’ Bêguman ma seba nêşikitişê grevê xo bi heme îradeyê xo xo ver da. Tewrê înan o xirab gama înan ma berdî dozgerî û doktorî zî dewam kerd. Heta aşitî bêro nê erdan ma do xoverdayîşê xo bidomnê.”