Endama Konseya Serekîya KCKyî Sozdare Avesta Bernameyê Taybetî yê Stêrk TVyî de rojdem ercna.

Qiseykerdişê Avesta ra tay noqtayê girîngî wina yê:

''44 mengan ra dima Rayber Apoyî de pêvînayîşê keyeyî ame kerdene. Xora cabîyayîşê nê pêvînayîşî rehet nêbi. Pêvînayîşê bi keye û avûkatan heqê Rayber Apoyî yê la dewleta tirke o esîr kerdo. Dewleta tirke kena ke nê pêvînayîşan sey hacetê şantajî vera têgêrayîşê ma, şarê ma bişuixilna.

Rayber Apo, şarê ma û têgêrayîşê ma 26 serran ra nata bi hawayêkê bêmabênî xo ver danê. Seba azadîya Rayber Apoyî her roje embazê zîndanan, cinî û ciwanî û şarê ma çarçewa Hemleya Azadîye de têkoşîn kenê. Pêvînayîşê Rayber Apoyî ra verî Bahçelîyî selamêk da û atmosferêko winayên viraşt ke seke do prosesê çareserîye dest pêbikero.

Rayber Apoyî pêvînayîş de Omer Ocalanî rê vato ke tecrîd dewam keno, eke dewlete samîmî ya o eşkeno cade meseleya kurdan çareser bikero û şerî biqedîno. Nê tewirê Rayber Apoyî ra dima KCKyî zî eşkerayîye daye û vat ke ma peyê îradeyê Rayber Apoyî de yê. Nika ancî cezaya dîsîplînî ya hîrê mengan dîyaya Rayber Apoyî. No zî mojneno ke dewlete do înkar û îmha de israr bikera.

Xora îqtîdarê AKP-MHPyî wayîrê ê ferasetî nîyo ke meseleya kurdan çareser bikero. Ma selamê Rayber Apoyî girewt. Ma do nê selamî bikerê bingeyê pîlkerdişê têkoşînî. Ganî ma nê têkoşînî her cayî ra vila bikerê. Ma do azadîya Rayber Apoyî bîyarê ca.

25ê Teşrîna Peyêne Roja Têkoşînê Vera Şîdetê Serê Cinîyan nêzdî bena. Ganî têkoşînê vera şîdetê serê cinîyan rojêke ney her roje bêro kerdene. Sey Têgêrayîşê Azadîya Cinîyan a Kurdîstanî bedelê ci se  beno wa bibo ma hertim têkoşînê xo pîlêr bikerê. 

Dewlete, hukmatî, keyeyî û Hîzbulkontrayî pîya qetilkerdişê Narîne nimit. Ancî ma nêzanenê ke Wan de Rojîne senî ameya qetilkerdene. Cînayetê winayênî her roje qewimîyenê. Dewlete, îqtîdar, sîstemê serdestîya camêrdan vera azadîya cinîyan ê. Azadîya cinîyan yena manaya azadîya komelî. Felsefe û azadîya Rayber Apoyî derheqê azadîya cinîyan de hemleyêka pîle afernaye. Hêrişê vera cinîyan îdeolojîk ê. 

Sîstem seba ke estbîyayîşê xo rê dewam bikero vera cinîyan her hawayî qirkerdişan keno. Ganî camêrdî vera nê sîstemî wurzê we, vengê xo berz bikerê. Ganî camêrdî her çî ra ver nêzdîbîyayîşanê xo bivurnê. Eke ê camêrdî xeta azadîye û têdûştîye nêpawenê senî xo rê vanê ê sosyalîst, demokrat û roşnvîr ê?

25ê Teşrîna Peyêne ganî biba a roje ke tewr zaf camêrdî rexneyanê xo danê. Ma sey PAJKî û KJKyî tim perwerde danê camêrdan. Têgêrayîşê ma ronîyayîşê xo ra nata têkoşînê vera cînsîyetperestî xo rê kerdo esas. Eke ma  her roje nêeşkê nê têkoşînî bikerê ma do nêeşkê asta azadîye dest bivisnê. Cinîyê rêxistinbîyayeyî hêzê tewr pîlî yê. Komel ganî bingeyê azadîya cinîyan de bêro afernayene. Krîterê azadîye tîya de yo.

27ê Teşrîna Peyêne serrgêra ronîyayîşê PKKyî yo. Ez serrgêra ronîyayîşê partîya ma fîraz kena. Serra 47ine ya ronîyayîşê partîye de ganî ma hîna zaf wayîrê erjanê xo vejîyê. PKK û PAJK partîyê şehîdan ê. PKK wayîrê milîtananê sey Asya Alî, Rojger Helîn û Memed Cûdîyî yê. Ganî ma tim xeta partîye de têkoşîn bikerê. Ez venga şarê ma, cinîyan û ciwanan dana ke emser hîna bi coşî ronîyayîşê partîya ma fîraz bikerê, xeta Rayber Apoyî de bêrê pêser û bi nê ruhî tewrê aktîvîte û çalakîyan bibê.

Bi na wesîle ez venga pêro şarê ma yê Ewropa dana ke 16ê teşrîna peyêne de tewrê Rayraşîyayîşê Kolnî bibê. Koln de ganî ma nê mesajî bidê ke ma tecrîdî qebul nêkenê û azadîya Rayber Apoyî wazenê.''