Rayberê Şarê Kurdî Abdullah Ocalanî 27ê Temmuze ra nat avûkatanê xo de, 5ê Nîsane ra nat zî Heyetê Îmralîyî de pêvînayîş nêkerdo û 11ê Êlula 2016 ra nata zî Ocalanî ra xebere nîna girewtene. Semedê qedînayîşê tecrîdê Îmralîyî, waştişê pêvînayîşî yê avûkatan û sîyasetkaranê kurdan, bi mehneyanî nêame qebulkerdene. Tewr peynî de Hemsereka KCDyî û parlamentera HDPyî ya Colemêrgî Leyla Guvene seba tecrîdê serê Rayberê Şarê Kurdî Abdullah Ocalanî wedarîyo kewtebî grevê vêşanîye. Parlamentera HDPyî ya Amedî Salîha Aydenîze babete sero qisey kerd.

Aydenîze vist vîrî ke  tecrîdo ke serê Ocalanî de yo 1999î ra nata bi şekilê sîstematîkî dewam keno û va: ‘‘No tecrîd dewamê komploya mîyanneteweyîye yo û sewbîna mîsalê nê tecrîdî dînya de çînîyo.

KOMPLOYA MÎYANNETEWEYÎYE DEWAM KENA

Aydenîze wina dewam kerd; "Tirkîya de  şexsê Ocalanî de qanûnê neweyî kewtî dewre û pêameyîşê neweyî yenî îmzakerdene. Qeraranê AHÎMî, rewşe CPTyî û qerarê Amerîka yo ke semedê îdarekaranê PKKyî ame dîyayane,  ramojnenê ke hemeyê înan parçeyêkê komploya mîyanneteweyîye yê."

Aydenîze pêkewtişanê Rojakewtena mîyanêne sey Şerê Dinya yê hîrêyin name kerdî û vat ke bitaybetî zî no şer serê kurdan de dewam keno. Aydenîze vat:‘‘ Ma Efrîn de , îşxalê Kerkûkî de û referandumê Başûrê Kurdistanî de reyna vîna ke hêzê kolonyalîstî kewtî dewre. Rayapêroyî  ya Mîyanneteweyîye qirkerdişê Efrînî de zî bêveng mend. No zî  delîlê komploya mîyanneteweyîye ya vera kurdan o."

WAŞTIŞÊ GUVENE WAŞTIŞÊ MA YO

Aydenîze derheqê  Leyla Guvena ke 37 rojî yo grevê vêşanîye de ya nê vatî: ‘‘Leyla Guvene  bi tesîrê Ocalanî  tewrê sîyasetê Kurdanbîye. Ocalan semedê kurdan zaf muhîm o. Leyla Guvene zî temsîlkara şarê kurdî ya. Ma zî hetê Leyla Guvene de yê û heta  azadîya Ocalanî  çalakayanê xo rê her tim dewam kenî.''

ÎŞXALKARÎ CINÎYAN Ê KURDAN RA TERSÊNÎ

Aydenîze vist vîrî ke cinîyan bi felsefeya  ''heta cinî azad mebo, komel azad nêbeno“ ya Ocalanî xoverdayîşêk da û bîyê wayîr qerarî û  wina qedîna:‘‘ Ma nimûneyê naye Rojawan de dî. Cinîyan yew hetî ra mewzîyan de şer kerdêne, hetêk ra zî xebatê înşakerdişê cuya de ca girewtêne. Xoverdayîşê cinîyan ê kurdan îşxalkarî tersnayî. Coka tecrîd hîna ame xorîkerdene.''