Zîndanê Girewteyî yê Tîpê Tyî yê Burhanîye yê Balikesîrî de 4 cînîyê tepişteyî 6 rojî yo grevê vêşanîye yê bêdem-bêagêrayîşî de yê. Reyna Zîndanê Sîncanî de zî 3 cinîyan dest bi grevê vêşanîye yê bêdem-bêagêrayîşî kerd.
Fîgen Şahîne ke Zîndanê Girewteyî yê Tîpê Tyî yê Burhanîye yê Balikesîrî de yena tepiştene û rîyê vînayîşê îşkeceyî ra cuwa ver ameyebî rojdem, da pêhesnayene ke aye pa embazanê xo Emîne Kiliçe, Gulîstan Tekine û Çîgdem Şakare 6 rojî yo dest bi grevê vêşanîye yê bêdem-bêagêrayîşî kerdo.
Mesajo ke Şahîne bi waya xo Nîrgul Turhale şawit wina yo:
‘‘Rewşê ma hewl o û moralê ma berz o. Grevê vêşanîye ke heme zîndanan de ameyî destpêkerdene hêz danê ma. Bi sebebo ke nê xoverdayîşê serkewtişî de ma zî beyraqê xoverdayîşî kirişenê, ma bicoş û biheyecan ê. Eke ma sereberz vinderê, ma qezenc kenî û ma do qezenc bikerê. Serra neweye do serra ma ya xoverdayîşî bo. Ma xoverdayîşê Leyla Guvene silam kenî. Waştişê Guvene waştişê ma yo.‘‘
Hetê bînî ra Zîndanê Girewteyî yê Cinîyan ê Sincanî ra zî 3 cinîyan da zanayene ke înan bi heman waştişî dest bi grevê vêşanîye yê bêdem-bêagêrayîşî kerd.
Cinîyê tepişteyî Suheyla Taşe, Zelîha Ustabaşi û Salîha Taşkesene vat ke heta wedartişê tecrîdê serê Rayberê Şarê Kurdî Abdullah Ocalanî, çalakîya înan do dewam bikero.
Grevê vêşanîye yê bi des rojan ê bêdem û biagêrayîşî yo ke tepişteyanê PKK û PAJKî 27ê Teşrîna peyêne de Zîndanê Girewteyî yê Cinîyan ê Sincanî de dabi destpêkerdene mengêk xo dima verda û dewam keno.
