Vakurê Kurdîstanî û Tirkîya de polîtîkayanê şerî yê îqtîdarê AKP-MHPyî ra krîzo ekonomîk o pîl qewimîyeno. Şarî bi zêdînayîşê vayanê berheman, bac û faturayan dest pê serra newîye kerd.

Cinîyanê Amedî derheqê krîzê ekonomîkî de Jinnewsî rê qisey kerd û vera rewşe nêrazîbîyayîşê xo mojna.   

Remzîye Yavuz: Seba ke vayîya her çî zêde bîya ma êdî nêzanê se bikerê. Ne meaşî qîm kenê ne zî ma eşkenê debara xo bikerê. Îdare nêbeno, Nê şert û mercan de kes nêeşkeno lazimîya xo bi ca bîyaro. Meaşê ke yenê keye zî rojêke de qedîyeno.

Aleve Guneş: Ez bi taybetî nêeşkena lazimîyanê tutanê xo bi ca bîyarî. Seba nê krîzî ma mecbûr mendê. Seba ke nê problemê ma pîr bîyî na cuye ra ma nêeşkenê tehm bigîrê.

Fatma Memîş: Ma nêeşkenê debara xo bikerê û bi meaşê agarîyî înan ma perîşan kerdî. Çiqas meaş bide zî nê vayî de qîm nêkeno. Eke îmkanê ma bibê û ciwanê ma kar bivînê rewşe başêr bena.

Serpile Kiyar: Ma vayan reyde kewtî serra newîye. Meaşo asgarî ame zêdekerdene la reyna qîm nêkeno. Vayîya gazî ameye zêdekerdene, vaya ceyran û awe zî zêdîyaye. Her ca de kaos û krîz esto. Kes êdî nêzaneno se bikero.

Wendekare Eyleme Karakuş: Ez wendekar a la bûrsê ke gêna kêm o, mi rê nêmaneno. Vayîya wargehî zî ame zêdekerdene û vayîya otobusan zî zêdîyaye. Pereyê ke ma rê yeno qîmê ma nêkeno û ma nêzanenê ke bidê ça. Eke ez unîversîta biqedîna  zî hêvîya mi çin o ke bîbî wayîrê karî. Çunke xeylêk mezunî bêkar ê. Gama ke ma nê rewşe vînenê, tira negatîf tesir benê. Wendekarî hêvî teberê welatî rê kenê.

Wendekare Asya Karakuş: Bûrsê ma 850 TL ya la 350 şino wargeh. Reyna hacet û lazimîyê ma yê unîversîte estê. Pereyê ke maneno ma do senîn pê biciwîyê. Şîyayîşê werdî zî ma nêeşkenê bide. Xora vayîya kitaban zî werte de ya. 

Heyate Aksu: Eke vayî zêde nêkerê û  kêm bikerê do şar zî bieşko boye bido. Mêrdeyê mi kar ra vetî. Ma kîra de yê la ma nêeşkenê kîraya xo bidê. Tutê mi sey vêşanî şinê mekteb, vêşan yenê. La Erdogan vano Tirkîya de feqîrî çin ê. Labelê meaşê xo rê zem keno, şarî zî pêrîşan keno. Tutê ma seba ke nêeşkenê debara xo bikerê, çîyê xirabanê sey fuhuşî kenê.

Hanimcane Akgun: Mêrdeyê mi betal o. Ma şert û mercê xirabî de ciwîyenê. Tutê mi wendekar ê la ma nêeşkenê înan rê kitab bigîrê. Ma faturayê ceyranî nêeşkenê bidê. Her çî vay o û vînayîşê karî zî xeylêk zehmet o.

Akîfe Guler: Ez şîya bazar xeylêk çî vay bî la mi zaf tay çî girewt. Çîyê ke mi girewtî 200 TL kerd. Çîyêk nîno girewtene. Meaşê ma 2 hezar o. Ma çîyêk nêeşkenê bigîrê û biwerê. Ma vanê ma şorba biwerê la a zî zaf vay a. Ma rîyê vayan ra nêeşkenê şêrê bazar û marketan.

Gulîstane Guneş: 4 tutê mi estê, na rewşe de xeylêk zehmetî ancenê. Xeylêk kesî nêeşkenê keyeyê xo rê nan bigîrê. Keyeyî nêeşkenê tutanê xo rê kitab bigîrê yan zî pêkayan bigîrê. Hukmat kesanê dewlemendan zêdêr dewlemend keno, yê feqîran zî zêdêr feqîr keno.