Endama Koordînasyonê PAJKî Berîtan Cûdîya ke tewrê programê bi nameyê Rojeva Jin ê Stêrk Tv bî rojdem ercna. Cûdî vat ke ê do bi xoverdayîş bikewê serra 2019î. Cûdî vat serra 2018 de sîstemê demokratîkî û yê kapîtalîstî sey 2 paradîgm şer kerd.

Cûdî nê vatî: "Sîstemê kapîtalîstî hetê cinî, ekonomî, weşîye û sîyasî ra xeylî kaosî vetî. La hemverê nê kaosan de xoverdayîşêko pîl ramojîya. Cinîyan û şaran hemverê nê de mîyanê mucadeleyî de bî. Tewr peynî dewletê mîyanneteweyî madenêkê komirî yê kanî yê Polonya de qaşo seba halkerdişê problemanê ekolojîkan ameyî têhet la înan netîceyêk nêgirewt. Dewletê mîyanneteweyî eslê xo de nêwazenê problemanê ekolojîkan hal bikerê."

'ŞARÊ EFRÎNÎ GIRÊDAYEYÊ ERDÊ XO YO'

Cûdî ard vîrî ke par Efrîn ameyo îşxalkerdene la şarê Efrînî girêdayeyê paradîgmaya Rayberê Şarê Kurdî Abdullah Ocalanî yo û girêdayeyê erdê xo yo û wina dewam kerd: "Efrînijî û şaro Kurd hemverê faşîzmî de vindertî. Seba ke şarî zaf rind manaya faşîzmî zanayêne xo kapîtalîzmî ra dûr girewt. Faşîzm bê dej, hestir, kaos û zordarî çîyêna nêyo.

Efrîn ame îşxalkerdene la çew nêeşkeno îrade û ruhê Avesta, Barîn û Îlaman esîr bigîro. Mayî vanê ke ma bê domanan eşkenê biciwîyê la ma bêerd, bêrûmet û bêşeref nêeşkenê. Şarê ma keyeyê xo ra û wareyê xo ra bi la rûmet û şerefê xo ra qe tawîz nêdano. Dewletî yewbînan raşte ra wedarenê. Dewletê kapîtalîstî senî Erdoganî danê vernî do ê wina raşte ra wedarê zî." 

LEYLA GUVENE ŞEXSÊ XO DE MUDAXELEYÊ PROSESÎ KERD

Cûdîye bale ante çalakîya Leyla Guvene zî û nê vatî: "Reyna vejîya werte ke tecrîdê serê Rayberîya mesleyêko mîyandewletî yo. Qerarê MHME û eşkerayîya CPTyî zî nê ramojnena. Cinî ya Kurde Leyla Guvene şexsê xo de mudaxeleyê nê prosesî kerd. Nê grevê vêşanîye reyna ramot ke PKK şar o, şar PKK yo. Çalakîya Umîd Acarî ke xo vêşna û grevê zîndanan tecrîd mehkûm kerd. Dewleta Tirkî seba ke nê çalakîyan ra tersena nê çalakîyan nêana rojdem. Rayberîya ma vatêne ganî cinî agêro cewherê xo. Sayeyê Rayberîye de cinî hendî hunermend, fîlozof, sîyasetkar, fermandar û mîlîtan ê. Yanî cinîyî agêrayî cewherê xo."

CINÎYÎ HENDÎ HÎNA HIŞMEND Ê

Cûdî kampanyaya cinîyanê Amerîkaya Latîne arde vîr û qiseykerdişê xo wina domna. "Bi mîlyonan cinîyî tewrê na kampanya bî. Hetêna ra têgêrayîşê ‘Me Too‘ zî ame destpêkerdene û festîvalanê fîlman de sloganê ‘Jin Jiyan Azadî‘ bî berz. Bi nê ma zaf kêfweş bî, na slogane hendî bî unîversale.

Konferansanê Jîneolojî de zî hişmendîyêk virazîyaye. Hindistan de cinîyan resmê embaze Sara (Sakîne Cansiz) aliqnabi. No mesajêko muhîm o. Serkêşîya cinî ya Kurde yeno qebûlkerdene. Cinîyê ke xo ver danê vanê ma bende nêyê û mehkûmê sîstemê camêrdî yê serdestî nêyê."

ŞAR DO ŞERÊ PSÎKOLOJÎKÎ YÊ ERDOGANÎ VENG VEJO

Cûdî derheqê sîstemê hemserekîye û hêrişanê hemverê şaredarîyanê HDPyî de qisey kerd û nê vatî: "Rîyê sîstemê hemserekîye ra înan qeyûmî tayîn kerdî. Hemserekî seypêyîya cinî-camêrdî ramojnena. Erdogan vano ê şaredarîyan bigîrê ez do reyna qeyûm tayîn bikerî. Ganî şarê ma yo ke wayîrê îradeyî yo reyna rey bidê xo û şerê psîkolojîkî yê Erdoganî veng vejê."

Cûdî qiseykerdişê xo bi nê vatişan qedîna: "Rixmê zehmetîyan de emser zî gerîlayan ê cinîyan xeylî çalakîyî viraştî. Şarê ma xora şarêko biîrade yo. Hêzê şaran bomba û terîdî ra hîna bitesîr o. Ma bi na bawerî serra newî pêşwazî kenê."