Cuya ci rayîranê zîndanan de vîyarena

Feyzîye Kolakana ke 3 domanê ci tepişte yê û serra 1994 ra nata şina pêvînayîşê înan, vat ke bi serran o raştê zextan yenê û her tim sey “terorîst” yenê vengdayene.

Polîtîkayê dewleta Tirkî yê ke merdimîye dir eleqedarîya înan çinya seba merdimanê tepişteyan agêrayê birînêk ke tim gonî tera yena. Xusûsen tepişteyê sîyasîyî hîna binê zextanê giranan de yê. Hewna ke zîndanêk de nêameyê bicakerdene bi sirgûnî şirawîyenê yewna zîndanî.

Qaso ke aseno mîyanê zextan de aya ke tewr zaf vejêna vernî polîtîkaya dewlete ya sirgûnî ya. Merdimê tepişteyan gama şinê bajaranê dûran hem hetê madî û hem zî hetê manewîyî ra zehmetîyanê pîlan ancenê. Feyzîye Kolakana ke serra 1994 ra nata şina pêvînayîşê domananê xo zehmetîyanê ke ancena ANFyî rê qal kerdî.   

 ‘LACÊ MI GAMA ZÎNDAN DE BI CINÎYA CI MERDE’

Kolakane vat serranê 90an de hîrê lajê ci zî heman wextî de zîndanan de bîyê, yew lajê ci hewna 12 serre bîyo ameyo tepiştene û yewna lajê ci zî gama ke zîndan de bîyo cinîya ci merda. Kolakane vat: “Game lajê mi zîndan de bi cinîya ci digane bîye. Polîsan hema hema her roje eştêne serê keyeyê ma. Veyva mi na yewe ra zaf tersabî. Domanê xo merde ard dinya. Wextêkê kilmî ra dima aye zî na yewe ra merde. Di domanê aye sêwî mendî. Mi înan zî xo dir berdêne zîndan. Seba ke halê ma yo madî rind nêbi, otobuse de mi înan dayêne çokanê xo ser. Kesê ke kîşta mi de roniştêne nerhet bîyêne, la çîyêk ke ez eşkayêne bikerî çinêbi.     

 ‘BI ÇIMÊ TERORÎSTAN EWNÎYAYÊNE MA RA’

Kolakane vat gama ke ê seba pêvînayîşî şîyê zîndanan seba ke cayêkê dûrî de bîyo yan bi trêne yan zî bi otobuse raywanî kerdê. La zafane zî wextê ci de nêeşkayê biresê pêvînayîşan, erey kewtê. Kolakane wina vat: “Rojêk gama ma ancî şîyêne Konya ma erey kewtî. Ez şîya verê dozgerê zîndanî û mi ci ra vat ‘ma bi trêne ameyê loma ma erey kewtî,’ ê zî mi ra vat ‘şima terorîst ê, ez heqê pêvînayîşî nêdana şima.’ Mi zî naye ser ê ra vat ‘Ma terorîst nêyê. Merdimî yewbînan kişenê, tecawuzê cinîyan kenê, dizdîtî û gendelî kenê, ê nêbenê terorîst ma benê?’   

 ‘SEBA KE CAYÊ MENDIŞÊ MA ÇINÊBI MA CAMÎ DE MENDÎ’

Kolakana ke Amed de ciwîyena bi serran o seba pêvînayîşê tepişteyanê xo kewena rayîranê dûran ser. Kolakane dewamê qiseykerdişê xo de nê vatî: “Seke senî ewro şaro ke rojawanê Tirkîye de yo bi çimêkê xirabî ewnêno ma ra û neheqîyan ro ma keno verî ra ê ma sey ‘terorîst’ name kenê. Rojêk ma yew roje verê pêvînayîşî şîbî Burdur. Zimistan bi, şewe bî. Keynaya mi sancîya velka girewte, çew nêbeno hetkar. Ma ro camîyêk gêrayî û peynî de yew camîya cinîyan dîye. Ma şî ûca şewa serdine de xalîyê camî piştî xo ro û wina bîyî germ. Mi înan ra vat ke wa qalê na mesela lajê mi rê nêkerê. Eke o pê bihesyo do zaf bikewo ver.”  

WAŞTIŞÊ AŞITÎYÊKA BIRÛMETE

Kolakane peynî de ard ziwan ke çi gamaa ke şinê pêvînayîş raştê bicaardişanê ke hêrişê rûmetê kesî kenê yenê û qiseykerdişê bi nê vatişan qedêna: “Hemverê heme zext û zehmetîyan de zî seba viraştişê pêvînayîşî ma xover dayêne. Zerrîya mi bi pîl şuxulêna û hêzê min ê hemverê hende dejan de xoverdayîşî roje bi roje beno kemî. Nê 25 serrî yê ke ez şina pêvînayîşanê zîndanî, ez wazena ke tavilî peynî ro heme dejan bêro.”