Jîna Emînîya ke Rojhelatê Kurdîstanî ra ya, hetê 'polîsanê exlaqî' yê rejîmê Îranî ra seba ke gijikê ci asayêne bi îşkenceyî amebî qetilkerdene. Vera qetilkerdişê Jînaya 22 serre Rojhetalê Kurdîstanî û Îran de çalakîyî dewam kenê.

Endama Fermandarîya Pêroyî ya YPJyî Rohilate Efrîn derheqê babete de cewab da persanê ANFyî.

Rohilate Efrîn pare kerd ke rejîmê Îranî mezgê serdestîya camêrdan ser o ronîyayo û vat: ''Îran de estbîyayîş û heqê cinîyan yenê redkerdene, îradeyê cinîyan nêno qebulkerdene. Sîstemê rejîmê Îranî cinîyan sey koleyan vîneno. 1979 de serewedaritişê Rojhelatê Kurdîstanî de cinîyan serkêşîye kerdêne û vera dîktatorîye sere wedaritêne. Coka bi taybetî cinîyê kurdî tim benê hedefê rejîmê Îranî. Rejîmê Îranî têna cinîyan ê kurdan ra nê pêro cinîyan ra terseno. Çunke cinîyî wayîrê tewirêkî yê û tim serkêşîya qewimîyayîşan kenê. Rejîmê Îranî naye ra hêrişê cinîyan keno. Rejîmê Îranî zaneno ke cinîyî eşkenê înan birijnê û cuya azade awan bikerê.

Hukmatê Îranî seba ke şarî û cinîyan bikero kole sîyasetê vêşanîye keno. Rojhelatê Kurdîstanî de vera nê sîyasetî di serrî yo serewedaritişî qewimîyenê. Nê serewedaritişî rejîmê Îranî tersnenê. Coka rejîmê Îranî wazeno cade bi şîdetê nê serewedaritişan bin bikero.

Cinîyê Rojhelatê Kurdîstanî vejîyenê waran û pê çalakîyanê xo wayîrê Jîna vejîyenê. Çalakîyê cinîyan ê Rojhelatî sey destpêkê Şorişê Rojhelatê Kurdîstanî eşkenê pênase bibê. Cinîyê Rojhelatî waran de rejîmê Îslamî rê vanê nê. Çalakîyanê winasênan de ruhê cinîyan zî eşkera beno. Eke cinîyî bibê yew, vengê xo bikerê yew, wayîrê yewbînan vejîyê bêguman bi azadî do ser bikewê.

Rewşêka winasêne de ma venga cinîyan ê çar parçeyanê Kurdîstanî û cinîyan ê dinya danê ke xo rêxistin bikerê û bipawê. Ganî ma qetî teslîm nêbê. Senî ke ma dejê xo pare kenê, ganî gamê ma yê azadîye eynî bibê. Ma sey YPJyî pê bawer ê ke şorişêko bîn do bi rengê cinîyan ê Kurdîstanî biqewimîyo. Ma zî sey hêzêkê cinîyan bi fikr û qewetê xo hetê pêro cinîyan ê xoverdayoxan de yê û ma xoverdayîşê înan selam kenê.''