Serekê HADEPî yê Silopîya Serdar Taniş 2001 de hetê hêzanê tirkan ra amebi destbendkerdene la dima ey ra xeberêke nêameye girewtene. Derheqê serebûtî de Mehkemeya Heqanê Merdiman a Ewropa (MHME) Tirkîya mehkum kerdibî

Birayê Tanişî Yakup Tanişo ke Hemserekê HDPyî yê Silopîya yo derheqê babete de ajansê ma rê qisey kerd.

Tanişî vat  ke dewlete 50 serrî yo vera kurdan şerêko bêexlaq ana ca û Serdar zî nê şerî de bîyo hedef. Tanişî îfade kerd ke Şirnex 90an de sey laboratuwarê îşkence û faîlanê meçhulan ê dewlete bîyo û vat: ‘’Şirnex de seba awankerdişê rêxistina HADEPî 5 tenî lazim bîyê la tedayan ra na hûmare nêameye temamkerdene. Dime ke Serdar bi serekê qeza rêxistine ameye awankerdene. Her kesî ser o teda est bîye la Serdarî xo ver da.

Bînaya partîye 18ê çeleyê 2001î de ameye akerdene. Serdar û endamê partîye Eyyup Kocayî seba akerdişê xeta telefonî muracat kerdêne. O çax wesayîtêkê sivîlî înan rê vato ke wa şêrê îfade bidê. Serdarî qebul nêkerd. La dima wirdî ancî vengdayîşê Fermandarîya Cendirmeyan ser o neçare mendî ke şorê îfade bidê. Serdarî verê qereqolî de vato ‘Ez şina îfade dana, yena.’ La şan bi ey ra xebere nêvejîyaye. Ma şîyî qereqol. Leşkeran vat ‘Kesêko winayên nêame tîya.’ Şahîdê ma est bîyê. Ma dosyayî top kerdî, şahîdî arê dayî. Dosya Serekê ÎHDyî yê Amedî Osman Baydemîrî û avûkat Tahîr Elçîyî teskîmê MHME kerdibî. MHME panc saetan de dosya qebul kerdibî û Tirkîya mehkum kerdibî.  

Serdar oyo yewin nêbîyo ke dîyayo vinîkerdene. Serranê 90an de bi hezaran kesî dîyayî vinîkerdene, 2000an de îşkence û kerdişê xirabî ancî est bîyê. Ganî dewlete hinî rexneyê xo bida. Haştîye bi têrîameyîşî bena. Komîsyonê Cigêrayîşê Raştîyan ganî bêro awankerdene. Dewlete heta ke kerdişanê xo de têrî nêba do aver nêşora. Derheqê vindîbîyayeyan de têrîbîyayîşo raştikên şert o.’’