Sarya Ozgura ke bi vatişê “karê şorişgêran şoriş kerdiş o” beyraqa xoverdayîşî Paramaz Kizilbaşî yo ke vatibi ‘her zerrî hucreyêka şorişgêr a‘ ra dewr girewtebî, serê şehadetê ci ra 4 serrî vîyartî. Embaza Ozgure Mizgîn Axine derheqê aye de qisey kerd.
Dimayê destpêkerdişê îşxalê AKPyî û DAÎŞî yê Kobanê yê 15ê Êlule 2014î Sîbel Bulute (Sarya Ozgure) ya MLKPyîye tewrê xoverdayîşê Kobanê bî û 12ê Kanûne 2014 de zî tewrê kerwanê şehîdan bî. Gama ke ma rojanê tewr giranan ê şerî de Sarya Ozgure dir Kobanê de roportajêk viraştibi aye vatibi: “Ma do heta peynî xo ver bidê, nêşinê cayêna û eke lazim bibo ma do şehîd zî bikewê.” Bi nê vatişî qerardarîya xo ardebî ziwan. Embaza ci Mizgîn Axîne Sarya Ozgure ANFyî rê qal kerde.
Mizgîn Axîne vat: “Vatişê Sara Ozgure yo ‘karê şorişgêran şoriş kerdiş o‘ seba ma parola ya. Vakurê Kurdistanî ra heta Tirkîye û Ewropa ra heta Rojakewtena mîyanêne xeylî kesî qerardarîya Sarya ra mutesîr bîyî û tewrê mucadeleyî bî. Ewro Rojava de tabûrî ronîyayî, MLKP bi cayî û mucadeleyê xo rê dewam keno. Beyraqa ke embaza ma Sarya ma rê verdaya ma koyan de û deştan de kenê berz.”
KOMUNÎSTAN RÊ GURE…
Saryaya ke wextê xoverdayîşê Kobanê de Cizîre ra şina bi Kobanê û ûca grûba sabotajî de ca gêna, hemverê çeteyanê DAÎŞî de çalakîyanê bitesîran virazena. Ozgure roportajê xo yê 26ê Teşrîna verêne yê 2014î de nînan vana:
“Gireyêkê qedere yê ma yewbînan dir esto. Ma zanê ke kamca şaro bindest esto ganî komunîstî verê ê de ca bigîrê. Kamcayê dinya de beno wa bibo ma kîşta karker û kedkaran de yê. Sey MLKP bi nê nizdbîyayîşî mucadeleyêkê ma yo 20 serre esto. Na yewe ra Rojava seba ma muhîm a. Nika Rojava û xusûsen Kobanê ser o hêrişê çeteyanê ke hêzanê emperyalîstan ra paştî gênê estê. Pawitişê Kobanê pawitişê Rojava yo, pawitişê Rojava pawitişê ameyoxê azadî yo. Kobanê tenya şarê Kurdî nêyo. Xoverdayîşê Kobanê do ameyoxê hemeyê Rojakewtena mîyanêne rê tesîr bikero. Eke ma biraştî komunîst ê û şorişgêr ê ganî ma tîya bê. Xêrcê nê zî her keso/a ke wijdanê ci esto ganî tîya bo.”
‘ARÎN MÎRKANE SEBA MA SEMBOL A‘
Saryaya ke çalakîya Arîn Mîrkane ra xeylî mutesîr bî wina vatêne: “Bi şorişê Rojava cinîyî vejîyayî vernî. Cinîyan sîleh girewt xo dest, no hetêk o. Hetêna ra êyê ke rayîrê şerî xêz kenê zî cinî yê. Êyê ke mewzîyanê vernî de yê, şehîd kewenê, fermandaarî kenê û îradeyêkê muthîşî ramojnenê. Xora ma çalakîya fedaî ya Arîn Mîrkane zî zanê. Na çalakî seba ma sembol a.”
XO BIDÊ NIZDÊ ŞORIŞÎ
Sarya nizdbîyayîşê dormeyanê çepan ê Tirkîye yê Rojava zî krîtîk kerdêne û wina vatêne: : “Eke cayêk şoriş esto ûca di xusûsîyî estê oyo ke eceqneno û oyo ke yeno eceqnayene. Têgêrayîşê Tirkîye yo şorişgêr tesîrê şowenîzmî de mendo. Gureyê şorişgêran şoriş kerdiş o. Ça eceqnayîş esto ganî şorişgêr şiro ûca. Ewro Kobanê û Rojava nê halî de yê. Werte dexoverdayîşêk esto û ganî ma nê xoverdayîşî rê hêz bidê. Ganî şorişgêrî bêrê tîya. Eke nêeşkenê bêrê tîya zî cayê xo ra paştî bidê nê xoverdayîşî.”
Seba Sarya Ozgure ewro saet 11.00 de Kobanê de serê Cadeyê 48. de ke nameyê aye dîyayo pa do hetê hemrayanê ci ra û Meclîsê Keyeyanê Şehîdanê Kobanê ra atkîvîteyêka vîrardişî bêro organîzekerdene.
