Fermandara YPJyî Newroz Ehmeda ke derheqê serra 2018î de qisey kerd vat ke wa çew xo mexapîno. Hêrişkar û pawitoxê  Rojawanî eşkera yê. Her kes ganî naye hole bivîno û goreyê naye têbîgêro.

 Fermandara YPJyî Newroz Ehmede  persê rojnamegere Ruken Cemale cewab kerdî.

Qiseykerdişê Ehmede ra tayî cayî wina yê:

‘‘Serra 2018î seba Vakurê Sûrîye serra mucadeleyî bî. Ma mucadeleyê  xo yê vera DAÎŞî ra xeylî dersî vetî. Ma bi îdîa û qerardarîya girde kewtê serra newî.  Ma waştêne ke serra 2018î  bikerê serra hûzûr û aşitîye la seke yano zanayene hêrişê Efîrn bi. Efrîn cayêko biasayîş bi. Heme cayanê Sûrîye ra her kesî verê xo dayêne Efrînî. Dewleta Tirkî hêrişê Efrînî kerd û waşt ke wa herinda Kurdan de DAÎŞ bibo.  Erdogan zaf hole zano ke eke Kurdî wayîrê statuyî bî qederê ey zî bedilyeno. Coka bêmabên her cade hêrişê Kurdan keno. Dimayo ke Efîn ame îşxalkerdene, rojake bê merg, îşkence, remnayîş, talan û tecawuzî ravêro çîn a. Hedefê o yo ke Efîn û şarê Efrînî îşxalê dewleta Tirkî ra bixelisnê.

Dewleta Tirkî bi heme teknîkê xo hêrişê  Efrînî kerd la vera tank,top û bombardûmanan şerwanê faaî û jîhatî vejîyayê orte. Embaza Avasta  îradeyê cinîya azade ramot dişmenî. Efrîn de Avasta bîye xeta xoverdayîşî. Roysere, Avesta, Zîlane û Tekoşîne bi çalakîyê bitesîrî viraştî. Coka dewleta Tirkî ya îşxalkare bedenê embaza Barîn û Amargî rê destê xo derg kerd.  

Efrîn de xoverdayîş dewam keno û hetê bînî ra ma dest bi Hamleya Firtineyê Cizîrî kerde. Ma zanê ke Erdogan wazeno ke emrê DAÎŞî derg bikero. Coka ma hamlaye xo daye domnayene. Şertanê zaf bizehmetî de bi hezaran kîlometerî DAÎŞî ra ameyî pakkerdene.  Ma qayîlê ke demo kilm de xebara rind a ke hetê şarê ma û heme dinya ra yena pawitene bidê.

Ma bi hêzanê koalîsyonî dest bi mucadeleyî nêkerd û bê înan do mucadele meqedîyo.Coka ma ewro ra tepiya mucadeleyo hîna gird danê. La wa çew xo xapîno. Hêzo ke hêrişê herême keno zî hêzo ke herêmî paweno zî zelal o. Ganî her kes na heqîkete bîvîno û bipawo.

Wa her kes hole bizano eke reyna na herre de şer vejîyo,  ma hinî sey verî şer nêkenî. Ma seba çarekerdişê sîyasîyî dîyalogî rê hadre yê. Hêzê dinya senî wayîrê xeylî şaran vejîyayê ganî wayîr şaranê Rojawan û  Vakurê Sûrîye zî bivejî. Înan ke bedel dayo ganî prosesê çareserî de zî ca bigêrê.Ma sey YPJyî şerî rê hadreyê la ma wazenê ke na serre wa bibo serre aşitîye. Ma reyna vanê,  ça de şarê marê hêriş bêro kerdêne, ma do uca de şarê xo bipawê.‘‘