Hecoye: Hetkarîya gerîlayan seba êzidîyan bîye mîladêk

Hemsereka verêne ya MXDŞyî Rihane Heco bale ante Qirkerdişê Şingalî de rolê dewleta tirke ser û pare kerd ke rolê PDKyî zî tede estbi. Rihane vat: ''Key ma dî hêzanê HPG û YJA-Starî hetkarîye daye ma mîladêk bîye.''

Hemsereka verêne ya MXDŞyî Rihane Heco derheqê Fermanê 3ê Tebaxa 2014î de ANFyî rê qisey kerd. Beşo 3. yê qiseykerdişê Rihane Heco kilmêk wina yo:

''Wexto ke DAÎŞî hêrişê Şingalî kerd hêzanê PDKyî û Iraqî ma war verdayî. Ê mejbûr bîyêne ke ma bipawê la wezîfeyê xo nêard ca. O çax PDKyî destê şarî ra çeke zî arê daye û ma bêpawitiş verdayî. Pêşmergeyan heta şewa qirkerdişî ma hete de ma rê vatêne ê hê tîya de yê. La roja qirkerdişî pêşmergeyî pê çeke, cebilxane û hêzanê xo remayî Başûrî. Na bêwijdanîyêka pîl bîye. 

Gerîlayan wexto ke verê xo dabi Şingalî zanayêne ke Şingal ho çi hal de yo, tede şerêko pîl esto. La reyna zî ê ameyî. Eke PKK, HPG wayîrê êzidîyan nêvejîyayêne estbîyayîşê înan zî vînî bîyêne. Rayberîye seba pawitişê Şingalî talîmat dabi gerîlayan. Ney ma rê zaf tesîr kerd.Ma rê mîladêk bi ke gerîlayê HPG û YJA-Starî resayî hewarê ma. Ma qetî nêdî ke çew semedê ma şîyo merg. No şar do tim perwerê HPG û YJA-Starî bo.

PKK zî sey êzidîyan zulm qebul nêkeno û sereyê xo nêano war. Ma vatêne qey ma bi temamî do bêrê qirkerdene. La gerîlayan ma rêxistin kerdî, perwerde da ma, planê qirkeran pûç kerdî. Hêzê PKKyî ma rê bîyî hêvî û înan îmkanê cuye awan kerdî. Nika cinîyê êzidîyî pê paradîgmaya Serek Apoyî rayberîya komelî kenê, şar semedê heqanê xo û statuyê xo têkoşîn keno.

Tirkîya DAÎŞ şawit ma ser. PDKyî zî ma qirkerdişî reyde têrî verdayî, ma rê xayînîye kerde. Nika nê wirdî û Iraqî dostê yewbînan ê. Neteweyê Yewbîyayeyî vera kerdişanê Tirkîya bêveng ê. Oyo ke DAÎŞ nêeşka bikero nika pê qanûnan yeno kerdene. La ma do pê rêxistinîya xo verê pêro hêrişan û planan bigêrê.

Belçîka û Hollanda ferman sey jenosîd qebul kerdo. Na gamêka girîng a. La gereka statuyo xoser ê Şingalî zî bêro şinasnayene, sûcdar û hemkarê fermanî hesab bidê, gorê komkî bêrê akerdene, êzidîyê esîrî bêrê veradayene. Nêşinasnayîşê îradeyê êzidîyan zî qirkerdiş o. Eke ferman bêro şinasnayene gereka statu zî qetî bêro şinasnayene.''