Endama Konseya Serekîya Pêroyî ya KCKyî Zilare Stêrk cewab da persanê Gulane Botan û rojdem ercna. Qiseykerdişê Stêrke ra beşêk wina yo:

''Rayberê ma 23 serrî yo binê tecrîdî de yo. Vera tecrîdî têkoşînê têgêrayîş û şarê ma beno pîlêr. Pêro dinya ra merdimî wayîrê rayberîye vejîyenê. Şarê ma pê çalakîyanê xo tim wayîrê Rayber Apoyî vejîyeno. Hetê bînî ra mesuldar û muxatabê nê tecrîdî zî pêro dewlet û rêxistinê heqanê merdiman ê. Ganî Mehkemeya Heqanê Merdiman a Ewropa ya Konseya Ewropa hesabê tecrîdî Tirkîya ra bipersa.2014 de înan vat tirkîya bira înan a vera tecrîdî binpay kerda. O çax wa vera Tirkîya caardişan bikerê. La ê bêveng mendî. Ma na bêvengîye şermezar kenê. Tecrîdê Îmraliyî bingeyê krîzanê Tirkîya yo. Mefteyê çareserîya meseleyan Îmrali de yo. Eke berê Îmraliyî abibê meseleyî do çareser bibê. Tecrîdê Îmraliyî û çareserîya meseleya kurdan pabesteyê yewbînan ê. Heta ke sîstemê tecrîdî nêwedarîya krîzê welatî çareser nêbenê.

Cinîyî qetî serdestîya camêrdan qebul nêkenê û vera ney têkoşîn kenê. La aya ke do cinîyan aver berê rêxistinî ya. Têkoşînê cinîyan têkoşînê heq û azadîyan  o. Ganî no têkoşîn pê averberdişê rêxistinîye bêro geşkerdene. Ganî cinîyî asta globale de rêxistinîya xo pîl bikerê, îrade û têkoşîn pê rêxistinîye benê. Cinîyî ganî seba azadîye û heqanê xo hemparîye xo rê esas bikerê, bibê yew. Ganî têna cinîyê komelêkî ney cinîyê pêro dinya heman wextî de têkoşîn bikerê û azadîya xo bivisnê destî. 

Ganî cinîyî seba estbîyayîşê xo, vera neheqîyan û şîdetî hêzê xopawitişî aver berê. Xopawitiş zî pê rêxistinîye û awanîya mekanîzmayan beno. Ganî cinîyî warê fikrê azadî  zêdêr aver berê. Nê serran de zaf kesayet û rayberê cinîyî vejîyayî werte. Ganî nê cinîyî pê îfadeyê fikrê azadî berhemanê afernayîşî bikerê xorinêr.

Ez serrgêra 44. ya ronayîşê PKKyî fîraz kena. Têkoşînê PKKyî kesayetanê kurdan de vurîyayîşê pîlî viraştî. Pê têkoşînê PKKyî kesayetê binkewteyî ra, kesayetê kolekerdeyî ra kesayetêko azad ame afernayene. No zî pê têkoşîn û keda Rayberîye ame destvistene. PKKyî warê leşkerî de zî destkewteyê pîlî vistî destî. Rayberîya Egîd û Zîlane de artêşa pîle ya gerîlayan awan kerde û Hemleya 15ê Tebaxe ra nata na artêşe hha têkoşîn kena. Nika bi taybetî 23ê nîsane ra nata vera gerîlayan û Kurdîstanî hêrişê pîlî estê. Gerîlayî mîyanê xoverdayîşê tarîxî de yê. Gerîlayî hêvîyê merdimîye yê, nameyê rûmetê merdimîye ser o şer kenê. Gerîlayî hêzê xo xoverdayîşê Rayber Apoyî ra gênê. 

Îqtîdarê AKP-MHPyî key beno teng hêrişê gerîlayan keno û pê nê hêrişan keno ke binkewtişê xo binimno. Ê vera gerîlayan çeka kîmyewîye û gazê jehrînî xebitnenê. Ganî şarê ma, dostê ma hetê gerîlayan de têkoşînê înan geşêr bikero. Ganî dezgehê mîyanneteweyî vera şuxilîyayîşê çeka kîmyewîye mesuldarîyanê xo bîyarê ca. 27ê teşrîna peyêne de wa şarê ma Ewropa de çalakîyanê pîlan bikero. Ez reyna venga şarê ma yê Ewropa dana ke bi xurtî tewrê çalakîyan bibo.''