Cinîyê ke bîyê kokim seba ciwînayîşê kulturê xo xover danê. Dêrsimo ke her herêma ci de cilê birengî û xusûsîyî yê cinîyan estê, şaristanêk o ke bi kofîyan û pûşîyanê xo yeno naskerdene. Kulturo tradîsyonel dewanê Dêrsimî de hetê cinîyan ra yeno ciwînayene. 

KOFÎ: KULTURO KE TARÎX RA HETA BI EWRO AMEYO KIRIŞTENE

No tradîsyono ke bi seserran o dewam keno mîyanê ocaxanê Qureyaşn û Derwîşcemalî yê di ocaxanê bitesîran ê Dêrsimî de bi di hawayî yeno domnayene. Cinîyê ke Ocaxa Qûreyşan ra yê kofîya reng-rengêne danê serreyê xo, cinîyê ke Ocaxa Derwîşcemalî ra yê zî pûşîyêk danê serreyê xo û ser o zî mexmele girê danê.

Cinîyî vanê ke ê zafrengîya Elewîtîye bi nê kofîyanê reng-rengênan temsîl kenê û êyê ke pûşîya sîya danê serreyê xo zî vanê ke no hemverê qirkerdiş û zulman de sîtemêk o.

AZ RA AZÎ DEWAM KENO

Şehrîban Barane (80) ke dewa Bargînî ya qezaya Mazgêrdî de ciwîyena bi pûşîya sîyaye ke sey kofî pêşena nê kulturî ciwînena. Barana ke parê aye yo henekerde yo sûr binê kofîya ci ra aseno vana verî înan serreyê xo wina pêştêne.

Barane vat: “Ma no kofîyan seba xemlî nê seba bawerî û kulturî danê serreyê xo. Verî cil û bergê ma zî cîya bî, la çend wext şino yenê xovîrrakerdene. La kofîyî hewna zî bi înad yenê girêdayene.”