Çalakîya nobete ya keyeyanê tepişteyan a ke 9’ê Nîsane ra nata vernîya Zîndanê Gebze yê Cinîyan ê Girewteyî yê Tîpê M’yî de seba paştîdayîşê grevanê vêşanîye yê ke bi waştişê wedaritişê tecrîdê serê Rayberê PKK’yî Abdullah Ocalanî yenê kerdene dewam kena. Keyeyî roja ewilêne ya çalakîye de 2 reyî ameybî destbendkerdene. La 5 rojî yo rixmê zextan de çalakîya nobete dewam kena.

‘Ma Do Hendî Çi Vîndî Bikerê’

Maya Îlhan Bayarî yo ke 26’ê Kanûne ra nata Zîndanê Tekîrdagî yê Girewteyî yê Tîpê F’yî yê Hûmara 1’inî de tepişte yo Zeynep Bayare vat, “Roje roja keye de roniştişî nêya. Ez veng dana mayan. 1 deqaya ke ma bikerê vîndî çina. Ez veng dana Emîne Erdogane zî. Eke lajê aye 108 rojî grevê vêşanîye de bibîyêne do cayê xo bivindertêne. A zî mayêk nêya? Wa tayê empatî bikero. Wa selahîyetdarî zî vengê ma bieşnawê. Cewab bidê waştişanê domananê ma. Wa heyetêk virazê.”

‘Heta Grevî Nêqedîyê Ma Do Ca Nêverdê’

 Sultan Bozkurta ke keynaya ci Newroz Bozkurte 1’ê Adare ra nata grevê vêşanîye de ya vat ke serê Ocalanî de 4 serrî yo tecrîdo girankerde esto. Bozkurte qiseykerdişê xo wina domna: “Çi heyf ke dewleta Tirkî hem kişena hem zî nêverdana ke ma cenazayan bigêrê. Heta nika 7 tepişteyan xo kişt. Înan nêverda ke ma cenazayanê înan zî wedarê. Ma zî qerar da ke seba paştdayîşê domananê xo verê zîndanan de nobete bigêrê. A roje ma di reyî ameyî destbendkerdene. Heta Ocalanî ra veng nêvejîyo no grevê vêşanîye nêqedîno. Heta grevê vêşanîye nêqedîyê ma do zî verê zîndanan ra nêşirê.”

‘Wa Tayê Empatî Bikerê’

Bozkurte nê vatî: “Wa qasê saetêk xo bikerê herinda ma. Wa nê tecrîdî wedarê û keyeyan û avûkatan bieşrawê Îmrali. Wa ûca ra vengêk vejîyo. Heta ûca ra veng nêvejîyo do domanê ma zî bimirê. Ma tîya ra veng danê parlamenter û şarê xo. Wa ma verê nê zîndanan de tena meverdê. Ê hêrişê ma kenê. Seba ke ma tay ê vernîya ma gênê, gaz erzenê û destbend kenê. Ez her kesî dawetê çalakîya ma kena.”

‘Hurzê Û Vajê Hendî Bes O’

Guler Bugdaye zî vat 100 rojî ra zêde yo ke domanê înan grevê vêşanîye de yê û vat, “Hendî vengêk bidê nê grevan. Domanê ma verê çimanê ma de helênê, şinê. Eke nê welatî de huqûq estbîyêne do wina nêbîyêne. Ganî her kes vejîyo û vajo bes o. Ma nê tecrîdî wedarê. Heta Ocalanî dir pêvînayîşî nêvirazîyê do mergî zî dewam bikerê. Seba ke mergî vindarîyê wa her kes hurzo û vajo hendî bes o.”