Meclîsê Cinîyan ê DEM Partî bînaya merkezî ya partîye de vera polîtîkayanê şerî deklarasyonêk eşkera kerd û kampanyaya ''Ma cuya azade û têdûşte de isrardar ê; vera şerî yê'' daye destpêkerdene.

Wekîla DEM Partî ya Amedî Sevîlaye Çelenk deklarasyon wend.

Deklarasyon de dîya zanayene ke polîtîkayê şerî benê sebebê nîjadperestî, xizanî û dişmenîya cinîyan û ame vatene ke Rojhelatê Mîyanênî de bi şeran destûr nêdîyeno ke meseleya kurdan bêra çareserkerdene. 

Deklarasyon de bale ameye antene ser ke çarçewa çaresernêkerdişê meseleya kurdan de tecrîdê vera Rayberê Şarê Kurdî Abdullah Ocalanî yeno caardene û no tecrîd ewro vilayê pêro zîndanan komelî bîyo. 

Deklarasyon de ame vîrvistene ke şeran û polîtîkayanê şeran ra şîdet û cînayetê vera cinîyan zî zêdîyenê û cînayetanê cinîyan de kerdoxî nênê cezakerdene.Deklarasyon de ame parekerdene ke çaresernêkerdişê meseleya kurdan beno sebebê zêdîyayîşê şîdetê vera cinîyan.

Deklarasyon de ame vatene ke cinîyî ganî vera polîtîkayanê şerî û şerê taybetî rêxistinîya xo xurtêr bikerê û bi aktîfî têbigêrê. Deklarasyon de ame vatene ke ganî cinîyî haştîye bi yewîya xo awan bikerê. 

Deklarasyon de wina ame vatene: ''Na çarçewe de ma kampanyaya 'Ma cuya azade û têdûşte de isrardar ê; vera şerî yê' danê destpêkerdene. Ma wazenê bikerê ke cinîyî pêro waranê komelî de biasê. Ma do çarçewa kampanya de nê şeş mengan de kargehan, konferans, panelan ûsn. virazê û vera şerî têbigêrê. Ma do serra 2025î bikerê serra haştîye. Ma do serrnê vajê ke 'şer ney haştîye mumkîn a.' Ma do vengê vera şerî pîya vejê û biresnê pêro dinya.''