Qezaya Pulurî ya Dêrsimî de, merkez de 1, dewan de zî 3, pêro pîya 4 cinîyî namzedê keyatîye yê. Komelî de fikrê ‘Cinîyî nêeşkenê bikê’ esto û no fikir nêverdano ke cinîyî komelî îdare bikê. Dêrsim de 4 cinîyî bîyî namzedê keyatîye û nê 4 cinîyî kenê ke nê fikrî çin bikerê û îdareyê dewanê xo bigîrê xo dest. Şehrîban Yerlîkaya Îrîke û Şîlan Aslane, derheqê projeyanê xo de, PÎRHA’yî rê qisey kerd.

Şehrîban Yerlîkaya Îrîke 39 serryî ya û Fakulteya Karnasî ra mezun bîya. Îrîke nêzdîyê 3 serran o ke bêkar a. Verî merkezê Pulurî de ronîşte bîya û 1 serre naye ra ver zewacî ya û zewacî ra dima ameya dewa Hanuşagi. Îrîke seba ke problemanê dewe çareser bikero bîya namzede keyatîye. Îrîke bi paştdarîya merdeyê xo bîya namzede û derheqê problemanê dewe de wina vana:  “Dewe de awa şimitişî çin a, zilb û rixa heywanan erzîna zereyê dewe, merayê dewe qedexeyî ver nêvejenê û dewijî nêeşkenê heywananê xo biçiraynê. Teyna berardiş çin o û kes karêk nêkeno. Ez seba ke nê probleman çareser bika bîya namzede.”

Qaso ke Îrîke vana ciwanî hetkarîye danê aye û vana kal û pîrî nêwazenê vurîyayîş bibo û tayê çiyî aver şorê. Îrîke no derheq de wina vana:  “Seba keyatîye kesê ke dewlemendê, teqawit bîyê münasip yenê dîyayene. Kesê ke hetê feodalite ra paştîya xo zexm a benê namzedi. Merkez de zî, dewan de zî weçînayîşî bîyê meydanê şerê hêzî. Ez do nê fikrî birijna. Ez wazena ke dewe de yew kitabxane awan bika. Ez biba muxtar yan zî nêba, ez do na projeya xo bîyara bi ca.” Îrîke venga cinîyan da û waşt ke cinîyî bibê wayîrê îradeyê xo û îdare de ca bigîrê. Reyna waşt ke cinîyî bibê yew û cinîyan rê rayîr akerê.

Şîlan  Aslana 22 serrî zî namzeda keyatîye ya

Namzedanê keyatîye ra yewe zî Şîlan Aslane ya û 22 serrî ya. Aslane dewa Buzlutepe de ciwîyena û seba ke dewa xo ra zaf hes kena bîya namzede. Keyeyê Aslane verî yew dewa bîne de ciwîyayo û 1994’î de seba ke dewe ameya vêşnayene bar kerdo ameyê na dewe û a serre ra nat na dewe de ciwîyenê. Aslane wina vana: ”Dewa ma ameyê vêşnayene û ma bar kerd ameyî tîya. Seba ke ma welatê xo ra hes kenê terk nêkerd. Ewro erazîyê dormeyê dewe qedxe yo û heywankar û citkarî nêeşkenê karanê xo bikerê.”

Aslane vana seba ke cinîya reqîbanê aye vera aye îtîfaq viraşto û seba ke namzedîya xo betal bikero ci rê pereyi teklif kerdê. Aslane no derheq de vana ganî cinîyî îdareyê komelî de ca bigîrê û seba naye kesî ra destur nêgîrê. Aslane vana cinîyî kare îdareyî hîna baş kenê û ganî şanc bidîyo ci.

Aslane fotografkarîye kena. Wexto ke pîyê xo ameyo tepiştene û kewto hepis, aye mabên dayo perwerdeyê xo û kare forograkarîye kerdo. Aslane xozaya Dêrsimî ra zaf hes kena û fotografanê aye de zî no yeno fehmkerdene. Aslane vana a do perwerdeyê xo dewam bikero û cuya xo do dewa xo de dewam bikero. Aslane peynîya qiseykerdişê xo de wina va: “Xozaya Dêrsimî zaf çi musna mi, coka Dêrsim seba mi sey maya min o. Ez wazena tîya de bimana û xizmeta şarê xo bika. Coka ez wazena ke şar paştdarîye û yew şans bido mi.”

​

​