Dîrektora HRWyî yê Tirkîye Emma Sinclaire tecrîdê serê Rayberê Şarê Kurdî Abdullah Ocalanî û binpaykedişê heqan yê Tirkîye ANFyî rê ercna.

Sinclaire vat: “Verî hîna zaf Kurd û dormeyê çepî raştê binpaykerdişê heqan ameyêne la ewro her hetî ra mexdûrî estê. Heme vengê muxalifî yenê muhakemekerdene. Muxalifê her hetan yenê qedexekerdene.”

 ‘SEKE HER ÇÎ NORMAL O TÊGÊRENÊ’

Sinclaire ard ziwan ke derbeyî ra dima mabênê 2 û 3 hezarî de leşkerî ameyî tepiştene, êyê ke mendî zî derbekerdişî ra nê, endamîya organîzasyonî ra ameyî muhakemekerdene û wina vat: “Zafê nê kesan bi hawayêkê keyfîyî ameyî muhakemekerdene û tepiştene. Zafê dosyayanê merdiman de fealîyetê ‘terorî’ çinyo la nê kesî zî çarçiwaya mucadeleyê hemverê terorî de yenê muhakemekerdene.”

Sinclaire dewamê qiseykerdişê xo de nê vatî: “Ma sey Human Rights Watchî hemverê her tewirê tecrîdî de yê. Xusûsen CPTyî xeylî reyan meseleyê tecrîdî de Tirkîye krîtîk kerdêne. Ocalan zî tede seba tepişteyî bieşkê heqanê xo yê sosyalan ra îstîfade bikerê Tirkîye ser o zextî estbî. La ewro nuqteya ke ma resayê ci de seke ma her çîyî kerdo xo vîr ra, nê meseleyî nênê munaqeşekerdene seke nê çîyê normalî bê.” 

 ‘EWROPA ZANA LABELÊ…’

Sinclaire vat ke tecrîd hendî tenya seba Ocalanî nê seba tepişteyanê bînan zî bîyo problemêko xeylî pîl û wina vat: “Çende bêveng bimanê zî tayê qayde û standardê CPTyî estê. Di serrî ra vêşêr yewna kesî dir pênêdîyayîşê Ocalanî nêno qebûlkerdene.

Ewropa rind zana ke Tirkîye de se beno. Labelê çi heyf ke polîtîkaya Yewîya Ewropa ya Tirkîye serê meseleyê koçberan ra rayra şina. Naye ra binpaykerdişê heqanê merdiman ê Tirkîye yenê peygoşkerdene.”

  ÇÎYÊ KE CIZÎRE DE QEWIMÎYAYÎ ZAF MUHÎM BÎ GANÎ MERDIM NÊKERO XO VÎR RA

Sinclaire meseleyê Cizîre ser o zî vinderte û nê vatî: “Çîyê ke Cizîre de ameyî ciwîyayene versîya krîzê multecîyan ê Sûrîyeyijan de mendî. Ma sey sazîya heqanê merdiman ûca se bibi derheqê ci de rapor amade kerd. Dimayo ke derbe ame viraştene reyêk de her çî birîya. Ame waştene ke serê qewimîyayîşanê Cizîre bêro girewtene. Ganî peygoş nêameyêne kerdene. Dima ra NYyî zî raporêk amade kerdibi la bi virazîyayîşê derbeyî ra dima mesele ame peygoşkerdene.”

Sinclaire peynîya qiseykerdişê xo de nê vatî: “Tirkîye îdîa kena ke huqûqê şerî ê herêman de nêvêreno. Wazena ke sûcê şerî nêrê munaqeşekerdene. Her çende hukmat biccardişanê xo sey ‘mucadeleyê hemverê terorî’ name bikero zî ganî ma çarçiwaya huqûqê merdiman de nizd bibê. Kişîyayîşê sivîlan û hêrişê hemverê cayanê ke herêmê şerî nêyê estbî û nê çîyî zî hetê sazîyanê heqanê merdiman ra ameyî îspatkerdene.”