Têgêrayîşê Cinîyan ê Kurdan ê Ewropa (TJK-E) bi eşkerayîyêke da pêhesnayene ke înan kampanyaya mektuban a ke 19ê nîsane de çarçewaya hemleya ''Abdullah Ocalanî rê Azadîye, meseleya kurdan rê çareserîya sîyasîye'' de dabî destpêkerdene, qedînaye û vat xeylêk welatan ra cinîyan Komîteya Vergirewtişê Îşkenceyî CPTyî rê 20 hezar mektubî şawitî.

Eşkerayîye de wina ame vatene: ''Ma kampanyaya xo ya 3 mengan de 20 hezar mektubî CPTyî rê şawitî. CPT ganî cade vera tecrîdê giranî yê serê Rayber Apoyî têbigêro û semedê wedaritişê tecrîdî wezîfeyê xo bîyaro ca. CPT eke wezîfeyê xo mîyaro ca do verê tarîxî de hesab bido. Ma sey cinîyan ke Ewropa de ciwîyenê ma do çalakîyanê xo rê dewam bikerê. Azadîya Rayber Apoyî azadîya ma ya.

Ma do vera hêrişê îşxalî yê dewleta tirke û hemkarîya PDKyî zî têkoşînê xo xurtêr bikerê. Pîya bi hêrişanê îşxalî xozaya Kurdîstanî zî dîyena adirî ver. Ma do sey cinîyan ê kurdan sey tim ewro zî vera hêrişan payan ser bê. Na çarçewa de ma veng danê cinîyan û şarê xo ke wa dormeyê hemleya azadîye bêrê têhet û vera hêrişanê îşxalî têkoşînî xurtêr bikerê.''