TJK-Eyî eşkerayîyêk daye û programê çalakî û aktîvîteyanê ke do bi wesîleya vîrardişê qirkerdişo ke 9ê Çile 2013 de amebi kerdene virazê eşkera kerd.

Goreyê nê,

- Roja 9ê Çile vernîya Buroya Enformasyonî ya Kurdistanî de do merasimê vîrardişî bêro viraştene; dima ra zî kombîyayîşêkê çapemenî bêro viraştene.

- Heman roje de do heme herêman de vernîya konsolosxaneyanê Fransa de numayîşê protestoyî bêrê viraştene.

- Roja 12ê Çile de Kurdî û dostê înan do welatanê Fransa, Almanya, Hollanda, Belçîka, Swîsre û Îngilîstan de rayraşîyayîşêkê merkezîyî û mîtîngêk virazê.

TJK-Eyî reakîsyon ramot û vat ke şeş serrî yê “kerdoxî bewlî yê û edalet tarîtîye de yo.”

Eşkerayî de nê vajîyayî:

“9ê Çile 2013 de hîrê hemrayê ma yê şorişgêrî Parîs de Buroya Enformasyonî ya Kurdistanî de hetê hêzanê îstîxbaratî yê Tirkî ra bi nizmî ameyî kiştene. Ma sazî û selahîyetdaranê Fransan zî seba ke rixmê bewlîbîyayîşê faîlî de edalet bica nêanê protesto kenê. Seba kiştoxî zî înan vat ‘zîndan de merd.’ Bi nê hawayî wazenê ke serê kiştişêkê sîyasîyî bigîrê.  

KURDÎ ŞEŞ SERRÎ YÊ PAYRA YÊ

6 serrî yo ke cinîyê Kurdî, şaro Kurd û dostê înan seba eşkerabîyayîşê qirkerdişê Parîsî payra yo. Seba ke raştî vejîyo meydan û sûcdarî ceza bigîrê şaro Kurd tim hîsdar têgêra. Hetêna ra menga Tebaxî ya 2017 de hêzanê xopawitişî yê Kurdan Başûrê Kurdistanî de grûbêka ajananê îstîxbaratê Tirkî bi ‘Operasyonê Sakîne Cansize yê Şorişgêrî’ tepişte. Nê ajananê îstîxbaratê Tirkî vato ke qirkerdişê Sakîne Cansize, Fîdan Dogane û Leyla Şaylemeze bi hayîya û tesdîqê serekwezîrê Tirkî yê ê wextî virazîya.    

MA RA TERSENÊ

Kerdoxî bewlî yê, çîyo ke ganî bêro kerdene bicaardişê edaletî yo. Ma tim vat ke ma do qirkerdişê Parîsî ra hesab bipersê. No seba demokrasîya Fransa îmtîhanêk o. No hêrişo ke Fransa de virazîyayo hemverê heme cinîyan de ameyo viraştene. Ma sey cinîyê Kurdî vanê ke şidet polîtîk û îdeolojîk o. Ma vanê no hêrişo ke hemverê hemrayanê ma Sakîne Cansize, Fîdan Dogane û Leyla Şaylemeze ameyo viraştene eslê xo de hemverê heme cinîyan de ameyo viraştene. Ê cinîya azade ra tersenê.

MA DO HESAP BIPERSÊ Û TEŞHÎR BIKERÊ

Ma do hesabê nê qirkerdişî bipersê û hemkarîyanê leyminan ê dewletan teşhîr bikerê. Heta dewleta Fransa kerdoxan bi edalet muhakeme nêkero û edalet bica nêaro ma do sey cinîyê Kurdistanî tim meydanan de bê. Ma veng danê heme cinîyan ê ke azadî û seypêyîye ra bawer kenê wa mucadeleyê ma rê paştî bidê. Ma veng danê her kesî ke xeyalê hemreyanê ma Sakîne Cansize, Fîdan Dogane û Leyla Şaylemeze bica biyarê.”