Platformê Cinîyan ê Dêrsimî banê Platformê Şubeyanê KESK’î yê Dêrsimî de derheqê îdîayanê tacîzî yê Unirversîteya Dêrsimî eşkerayîya çapemenîye daye.

Eşkerayîya ke bi nameyê platformî Meral Yildize wende de nê ameyî vatene: ’’Tirkîya de demo peyên de bitaybetî sazîyanê fermîyan de qewimîyayîşê tacîz-tecawuzî zêdîyayî. Bi sebebo ke tecawuzkar û hêrişkarî nênê cezakerdene, tecawuz û şîdet ê serê cinîyan her ke şino zafêr beno. Selahîyetdarî ganî wezîfeyê xo bica bîyarê û vernîya nê qewimîyayîşan bigêrê. Walîyê Dêrsimî derheqê qewimîyayîşê Unîversîteya Dêrsimî de vat ê do çîyêko hewce keno bikerî la gamêk nêameya eştene. Şexso ke qalê ci yeno kerdene hema karê xo ser o û no zî qesewetê ma zêdîneno. Xora yeno vatene ke demo ravêrte de Tekînoglû vernamzedê parlamenterî yê AKP’yî bi coka wendakarî hêzê ey ra tersenê û qisey nêkenê. Wa nêro vîrakerdene ke na babete de îhmalêko qij beno sebebê qetilkerdişê cinîyan. Ganî derheqê Cem Tekînoglûyî de tehqîqat bêro destpêkerdene û na babete bêro zelalkerdene.’’