Sîsê Bîngola 85 serrî ya ke Zîndanê Tîpê Tyî yê Tarsûsî ra sewqê Nêweşxaneyê Unîversîteya Mersînî bibî û rixmê nêweşîya ci ya xidare reyna amî berdene bi zîndan, mengêk a ke seba tehlîye rapor pawena.

Sîsê Bîngola 85 serrî ya ke nizdîyê di serran o zindanê Tarsûsî de yena tepiştene û rixmê heme nêweşîyan û serranê ci nîna tehlîyekerdene, 2ê Teşrîna peyêne de rewşê aye bibi xidar û sewqê nêweşxaneyî bibî. Sîsê Bîngole 8 rojî nêweşxane de dermankerdişî ra dima bi halê ci yê nêweşî reyna ameyebî berdene bi zîndan.

RAPOR KEWT EREY

Raporê ‘‘nêweşxane de nêeşkena bimano‘‘ ke ganî 2 hewteyan de bibo hadre, mengêk ravêrte la hema hadre nîyo. Pawitoxanê heqanê merdiman da zanayene ke rewşê Bîngole  xidar o û waşt wa a serbest bêro veradayene.

Avûkata Bîngole Gulşen Ozbeke vat ke a seba muracatê tehlîyekerdişî raporî pawena la raporo ke ganî 2 hewtayan de  bibîyêne hadre mengêk ravêrte  hema hadre nîyo.

WA MAYE SÎSÊ SERBEST BÊRO VERADAYENE

Hemserekê Komela Hetkarî û Paştîdayîşî ya Merdimanê Tepişteyan û Tewqîfkerdeyan ya Çukurova (TUAYDER) Ebedîn Aktaşî zî vist vîrî ke Bîngole nêweşxane de zî binê şertanê tecrîdî de ameye dermankerdene û va: ‘‘Na bêhuqûqîye û bêedaletîye ya. Cinîyêka 85 serrî ranzaya kelepçekerde de tedawîkerdiş bêexlaqîye ya. Maye Sîsê seba nasnameyê xo yê kurdî yena muhakemekerdene.  Çîyê winayênî nînê qebûlkerdene. Ganî Maye Sîsê cade serbest bêro veradayene.‘‘

REWŞÊ SÎSÊ XIDAR BENO

Hemserekê Komela Heqan a Merdiman a Mersînî Hakki Demîrî zî  zîndan de tepiştişê Bîngole sey binlingkerdişê heqê merdiman name kerd û waşt wa Bîngole cade sebest bêro veradayene. Demîrî vist vîrî ke Bîngole wazena ke wextê xo yê peyênî dewa xo de ravêrno û vat ke bicaardişê naye çîyêko merdimîye yo. Kesêko nêeşkeno îhtîyacanê xo bîyaro ca, zîndan de tepiştişê ci goreyê huqûqî nîyo.‘‘

Sîsê Bingola ke par ra zîndan de ya bi sucdarîya hetkarîya rêxistinî 4 serrî û 2 mengî cezaya aye esta.