Wan de hetê Platformê Cinîyan û Platformê Demokrasî û Kede ra semedê Rojîne Kabaiş rayraşîyayîşo meşaleyin ame kerdene. Verê rayraşîyayîşî polîsan şar girewt binê ablûqa. Bi xoverdayîşê cinîyan ablûqaya polîsan ameye şiknayene û merkezê bajarî de  bi slogananê Jin jiyan azadî û tîlîlî û çapikan rayraşîyayîş ame kerdene.

Badê rayraşîyayîşî eşkerayîye ameye dayene. Endama Komaleya Cinîyan a Starî Zeynepe Tagtekîn nê vatî: ''Welat açarîyayo goristanê cinîyan û domanan. Ma xapînenê vanê hêzê dewlete şima pawenê la her roje  cinîyî yenê vîndîkerdene û qetilkerdene. Nê welatî de vînîkerdiş û qetilkerdişê cinîyan û domana senî rehet o hende zî vînayîşê înan zehmet o. Tirkîya û Kurdîstan de her roje cinîyêka bine bi destê dewlete, hukmî û camêrdan yenê qetilkerdene. Şîdetê vera cinîyan sîstematîk û polîtîk o.

 Sîstemo ke Kurdîstan de bi tedbîranê îstîsnayan asayîşî vejîyeno verê ma herinda pawitişê cinîyan de verê qetilkerdişê înan akeno. Hêzê asayîşî têna sîstemê xo pawenê. Coka ma têna yewbînan ra paştî genê. Êyê ke vera qetilkerdiş û şîdetê serê cinîyan bêveng ê hemkarê nê sîstemî yê. Seba ke dewlete bi polîtîkayanê bêcekerdişî kiştoxan pawena şîdet û kiştişî zêdîyenê. Pêkerdişê mîyanneteweyîyî yê sey Pêkerdişê Îstanbulî çîn hesibyenê û heqê cuye yê cinîyan yeno binpaykerdene. Seba ke bi qanûnan pawitişê cinîyan nêano caardene û no sîstem mesûldarê kiştişê cinîyan o. Şîdet û qetilkerdiş qederê cinîyan nîyo. Ma do têkoşînê xo bidomnê.''