YJŞ: Xêrê Rayber Apoyî ra ma xo şinasna

Fermandarîya YJŞyî serrgêra fermanî de eşkera kerd ke cinîyan ê êzidîyan herinda mergî de cigêrayîşê cuya azade weçîna û vat xêrê fikranê Rayberê Şarê Kurdî Abdullah Ocalanî ra ê resayî na aste ke vera hêrişan vindenê.

Yewinanê Cinîyan ê Şingalî (YJŞ) bi wesîleya serrgêra Fermanê 3ê Tebaxa 2014î eşkerayîyêke daye. Eşkerayîye bi kilmî wina ya:

''Hêzanê komplogeran ê mîyandewletan pê destê DAÎŞî 3ê tebaxa 2014î de vera êzidîyan qirkerdişêk da destpêkerdene. Ma nê qirkerdişî şermezar kenê û qurbananê qirkerdişî yad kenê. Ma şehîdanê xo bi rêzdarî û minetî yad kenê. Ma perwerîya xo ya bi Rayber Apoyî dibare kenê ke ma qirkerdişî ra xelisnenê.

Qirkerdişê 3ê Tebaxe armanc kerd ke şexsê cinîyan de kultur, exlaq, tarîx bawerî û şarê êzidîyan çin bikero. Nê qirkerdişî de tewr zaf kêna û cinîyê êzidîyî mexdûr bîyî.  Nê ameyî rotene, maruzê hêrişê cînsîyî mendî, rayîrê koçberîye de merdî. Coka no qirkerdiş a raşte vera cinîyan bi. 

Şerwananê azadîye fikranê Rayber Apoyî ser o yewîya xo awan kerde, vera barbarîye şer kerd û verê qirkerdişî girewt. Sere de hêzê HPG, YJA-Starî, YPJ, YPGyî  vera talan û qirkerdişê Şingalî bêveng nêmendî û înan vera DAÎŞî xoverdayîşêko pîl kerd. Xêrê paradîgmaya Rayber Apoyî ra şarê ma xo şinasna û hêzê xo yê pawitişî awan kerdî. YBŞ û YJŞ bîyî bingeyê têkoşînî. Ma ewro resayî a aste ke eşkenê hêrişan vindarnê û cewabê ci bidê.

Semedo ke statuyê Şingaşî bi hawayêkê fermîyî nêno qebulkerdene tehlukeyê vera Şingalî dewam keno. Bi taybetî PDK seba qirkerdişê êzidîyan zemîn amade keno. PDK herinda ke şarê ma ra uzrê xo biwazo erdê ma pêşkêşê îşxalkeran keno. Êzidîyî do pê rêxistinîya xo cewanê nê tewirî bidê û îdareyê xoserî awan bikerê.

Her çiqa tehlukeyê vera Şingalî dewam bikero zî Şingal de têkoşîn aver şîyo. Şingal de şexsê cinîyanê rêxistinkerdeyan de vurîyayîşê pîlî qewimîyenê. Cinîyê ke vizêr bazaran de ameyêne rotene, merdimê ke rayîranê koçî de vêşan mendî ewro wayîrê îradeyî yê û hê gêrenê azadîye. Cinîyan ê êzidîyan herinda mergî de cigêrayîşê cuya azade weçîna. Vera fermanî xeta têkoşîn, cuye û xoverdayîşî resaye asta tew berze. Ma do qetî Fermanê 74. xo vîr a nêkerê û nêdê vîrakerdene.

Sey YJŞ ma qerardar ê ke têkoşînî pîl bikerê. Ma do xeyalanê embazanê xo yê eşhîdan bîyarê ca, hêzanê YJŞ û YBŞyî xurtêr bikerê, seba destvistişê statuyê xoserî yê Şingalî têkoşîn bikerê. Ma do çarçewa azadkerdişê Rayberîye de têkoşînê xo berz bikerê.''