YJA Star: Tewirê Bêrîtane sembolê xoverdayîşê rûmetênî yo

YJA-Starî serkêşanê PKKyî ra Bêrîtane yad kerde û vat: ''Embaze Bêrîtana ke wayîra kesayetê qehreman, rûmetên, rêxistinkerde û têkoşêrî bîya tewirê aye yê vera xeta îxanetî bîyo sembolê xoverdayîşê rûmetênî.''

YJA STARÎ RA EŞKERAYÎYE

Fermandarîya Qerargehê Merkezî ya YJA-Starî serrgêra 32ine ya şehadetê aye de Fermandare Bêrîtane (Gulnaze Karataş) bi eşkerayîyêke yad kerde. Eşkerayîye wina ya:

''Ma serrgêra şehadetê ci de Fermandare Bêrîtane bi rêzî yad kenê, çalakîya aye ya fedayîye selam kenê. Ma şexsê embaze Bêrîtane de pêro şehîdanê teşrîna verêne zî yad kenê. Vejîyayîşê Rayber Apoyî hêzanê zulmkeran rê bibi ters. Çunke Rayberîye seba cuya azade û rûmetêne bibî hêvî. Embaze Bêrîtane zî cuya rûmetêne û azade weçînaye. Embaze Bêrîtane şerkerdiş musna cinîyan. A heqê şertanê tewr zehmetîyan ra zî ameye û hêzê cinîyan eşkera kerd. Embaze Bêrîtane bi tewir û cuya xo îsbat kerd ke mîyanê artêşan de ganî cinîyî bibê artêşa xosere.

Eke cinîyî wayîrê artêşêka xosere nêbê, nêeşkenê bibê wayîrê îradeyî û azad. Embaze Bêrîtane na zanayêne û wina bawer kerdêne ke bi artêşa cinîyan cinîyî do bibê wayîrê îrade û hêzî. Aye embazê xo yê cinîyî çalakîyan rê amade kerdî. Bêrîtana qehreman cinîyan rê no musna; 'Cinîya bêhêz û qels çin a, cinîya qelskerde est a.'

Yanî embaze Bêrîtane pêro cinîyan rê bîya nimûneya milîtanîye. Aye 1992 de asta fermandarîya koman de dest pê erkî kerd. A fermandaranê verênan ê artêşbîyayîşê cinîyan ra ya. A bi radîkalî û cesûrî fikrê xo eşkera kerdî. Aye xo qelsîya dinyaya camêrdan ra xelisnaye û bîye bingeyê artêşa cinîyan. Embaze Bêrîtana ke wayîra kesayetê qehreman, rûmetên, rêxistinkerde û têkoşêrî bîya tewirê aye yê vera îxanetî têkoşînê azadîye de bîyo sembolê xoverdayîşê rûmetênî.

Cinîyanê kurdan sey Bêrîtane serewedaritişanê kurdan ê verênan de zî seba ke nêkewê destê dişmenî xo kendalan ra eştbî war. Ewro bi hezaran cinîyî rayîrê Bêrîtane ra şinê û serkêşîye kenê. Embaze Bêrîtane seba pêro gerîlayanê YJA-Starî nîsbeta xoverdayîşî ya. Ewro her cayê Kurdîstanî de cinîyî bi ruhê xoverdayîşî yê Bêrîtane vera xayînan têkoşîn kenê.

Tewr peyên embaz Bêrîtane Nurhaq Çîya xeta Bêrîtane eşkera kerde, aye xo ser de bomba teqnaye û şehadet weçîna. Embaze Bêrîtane keda ke Rayber Apoyî dabî cinîyan xera nêkerde. Aye ra serran pey Berwar Dêrsîm, Bêrîtan Nurhaq Çiya, Edessa Cejna, Axîn Gabar, Benda Amed, Leyla Sorxwîn, Hejar Zozan, Axîn Mûş zî rayîrê aye ra şîyê. Serhedî ra heta Botanî, Amedî ra heta Xarzanî, Dêrsimî ra heta Herêmanê Pawitişî yê Medya embazê ma vera dişmenî têkoşîn kenê.

Xeta îxanetî şexsê PDK û Barzanîyan de dewam kena. Bi taybetî Herêmanê Pawitişî yê Medya de nê xayînî dişmenî rê benê nefes. Tewirê Bêrîtane yê vera xayînan vîrê ma de yo. Ma bi tecrubeyan benê bihêzêr. Eke ê xeta îxanetî de israr kenê, ma zî xeta şerê rûmetênî berzêr bikerê. Şorişê Jin, Jiyan, Azadî do ser bikewo. Ma bi na wesîle ancî Fermandare Bêrîtane bi minetî yad kenê û soz danê ke do xeta aye teqîb bikerê.''